Jinoyat ishlari bo‘yicha Qashqadaryo viloyati Nishon tumani sudida bloger Abdulhakim Abjalilovga oid jinoyat ishi bo‘yicha sud yakunlandi. Bu haqda viloyat sudlari matbuot xizmati xabar berdi.
Ma’lum qilinishicha, 29-yanvar kuni jinoyat ishlari bo‘yicha Nishon tuman sudida Abdulhakim Abjalilov (1974-yilda Namangan viloyatida tug‘ilgan, blogerlik faoliyati bilan shug‘ullangan, “Achchiq haqiqat” MCHJ rahbari)ga oid jinoyat ishini ko‘rib chiqish bo‘yicha ochiq sud jarayoni yakunlanib, sud hukmi eʼlon qilingan.
Eʼlon qilingan sud hukmiga muvofiq, Abjalilov Jinoyat kodeksining 165-moddasi (tovlamachilik) 2-qismi “a”, “v” bandlarida nazarda tutilgan jinoyatni sodir etganlikda aybli deb topilib, unga 5 yil muddatga ozodlikdan mahrum etish jazosi tayinlandi. Tayinlangan jazoni umumiy tartibli koloniyalarda o‘tash belgilandi.
Birinchi instansiya sudining hukmi ustidan taraflar qonunda belgilangan tartib va muddatda Qashqadaryo viloyat sudiga shikoyat berish va protest keltirishga haqliligi maʼlum qilinadi.
Avvalroq 6,6 yil muddatga ozodlikdan mahrum etilgan bloger Otabek Sattoriy umumiy tartibli koloniyadan manzil-koloniyaga o‘tkazilgani to‘g‘risida xabar berilgandi.
Izoh (0)