Jinoyat ishlari bo‘yicha Samarqand shahar sudi o‘zini bloger sifatida tanishtirib, fuqarolarning muammolarini hal qilib berishi evaziga pul olib, aldab kelgan bloger ishini ko‘rib chiqmoqda. Bu haqda sud ishida qatnashgan “Daryo” muxbiri Farhod Norbo‘tayev xabar bermoqda.
Sudya Ma’ruf Ro‘ziyev raisligida o‘tkazilgan sudda jabrlanuvchi — Andijon viloyati Izbosgan tumanida yashovchi fuqaro Murodjon Qurbonov va Solijon Mirzayevlarning so‘zi tinglangan.
“Oshnam Solijon Mirzayev uyimni sotib beradigan bloger bor ekan, shularni gaplashsak nima bo‘ladi dedi. 2021-yilning 24-dekabr kuni O‘.CH. Namanganga sudga kelgan ekan. Suddan so‘ng men, do‘stim, O‘.CH. hamda uning ayoli sudni oldidagi oshxonada ovqatlandik. U yerda O‘.CH.ga uyim qimmat ekanligini aytib, ‘shuni reklama qilib berish qo‘lingizdan keladimi yo‘qmi’, deb so‘radim. U esa qo‘lidan kelmaydigan ishning o‘zi yo‘qligini aytdi. Shundan so‘ng Izboskanga uyni ko‘rishga bordik”, — deydi Murodjon Qurbonov.
Uning aytishicha, O‘.CH. shundan so‘ng unga bankka borib plastik kartochka ochishi kerakligini, 2022-yilning 6-yanvar kuni esa shartnoma tuzishi lozimligini aytgan.
“2022-yilning 5-yanvar kuni do‘stim Solijon Mirzayev qo‘ng‘iroq qilib O‘.CH. Andijonga kelganligini, hozir mehmonxonada turganligini aytdi. U yerga borib mehmonni uyga olib keldik. Uyni rasmga olishdi. 6-yanvar kuni yana uyga olib keldik. Shu kuni shartnoma tuzish kerakligi haqida aytdi. Ungacha pul to‘g‘risida umuman gap bo‘lmagandi. Do‘stim Sobir Mirzayevga ‘Taraqqiyot Media’ muhri urilgan shartnomani ko‘rsatishdi. Shartnomada reklama berish bo‘yicha birorta punktini ko‘rmadim. Men O‘.CH.ga shartnomada reklama berish bo‘yicha punktlari bo‘lmaganligini aytganimda, ‘men aytib turaman ruchka bilan yozib kiritamiz’, dedi. Bizni ishontirganligi uchun 1000 dollar berdik. Bizga reklamani tashladi. U uy bizning uyimiz emasdi. O‘sha reklama ham montajsiz, rasvo qilib berilgan. Biz tezda O‘.CH.ga qo‘ng‘iroq qilib, reklamadan qoniqmaganligimizni, uni olib tashlash kerakligini aytdik”, — deydi Murodjon Qurbonov.
Sudlanuvchi O‘.CH. da’vogarlarning gapiga javoban ularni aldash niyati bo‘lmaganligini, “agar shunday niyati bo‘lganda, yashash manzilim haqida ma’lumot bermagan bo‘lardim”, dedi.
“Namanganda gaplashganimizda reklama haqida aytganman. Qolaversa u menga reklama uchun pul bergan. Murodjon Qurbonov ijtimoiy tarmoq orqali meni yo‘q qilib yuborishi haqida video qo‘ygan. Bu bo‘yicha Andijon viloyati Izboskan tuman prokuraturasi tomonidan jinoyat ishi ochilgan. Men o‘zimni o‘zim va oilamni bandligini ta’minlab kelyapman. Davlatdan ish ber deb yurganim yo‘q. Nega meni izlab Namanganga bordi. Men uni majburlab Namanganga yur deganim yo‘q. Uning o‘zi meni izlab telefon raqamimni topgan”, — dedi sudlanuvchi O‘.CH.
35 yoshli O‘.CH. 2021-yilning avgust oyida fuqaro D.R.ga o‘zining blogerligini aytib, 600 dollar evaziga uy-joy masalasi bo‘yicha Fuqarolik ishlari bo‘yicha Past Darg‘om tuman sudida ko‘rilayotgan ishni ijtimoiy tarmoqlarga joylash orqali ijobiy hal qilib berishni va’da qilgan. U 2 million so‘m miqdoridagi pullarini olib, o‘zining ehtiyojlariga ishlatib yuborgan.
Bundan tashqari, O‘.CH o‘zining jinoiy harakatlarini davom ettirib, 2021-yil 7-sentabr kuni fuqaro Yu.D.dan 2 ming dollar evaziga uning nohaq ishdan ketganini ijtimoiy tarmoqlarga joylash orqali unga yetkazilgan moddiy zararni qoplash va ishiga qayta tiklab berishini va’da qilgan. Undan 1 000 dollar miqdoridagi pullarini olib, o‘zining ehtiyojlariga ishlatgan.
Izoh (0)