Bloger Abror Muxtor Aliy (Abror Abduazimov) hibsga olingani haqida xabar berilgan edi. Unga sud qarori bilan 15 sutka ma’muriy qamoq va 340 ming so‘m jarima jazosi berilgan.
“Daryo” tanishib chiqqan sud qarorida keltirilishicha, 6-fevral kuni Shayxontohur tuman hokimligiga ish bilan kelgan Abror Abduazimov va Xusrav Nasrullayev baqir-chaqir qilib janjal ko‘targan. Ularning o‘zaro janjaliga aniqlik kiritish maqsadida kelgan militsiya xodimlari qonuniy talablarini bajarmagan. Xodimlarga bo‘ysunmasdan, ommani o‘ziga jalb qilib, IIO xodimlariga nisbatan soxta uydirmalarni tarqatgani aniqlangan.
Sud majlisida har ikki huquqbuzar jahl ustida janjal ko‘targanini va IIO xodimlari talablarini bajarmaganini tan olib, qilmishidan pushaymonligini, bu kabi holat boshqa takrorlanmasligini bildirib, suddan yengillik berishni so‘ragan.
Abror Abduazimov va Xusrav Nasrullayev Ma’muriy javobgarlik to‘g‘risidagi kodeksining 194-modda (Ichki ishlar organlari xodimining qonuniy talablarini bajarmaslik) va 195-moddasida (Ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) ifoda qilingan huquqbuzarlikni sodir etishda aybli deb topilgan. Ularga 15 sutka ma’muriy qamoq va BHMning 1 baravari, ya’ni 340 ming so‘m jarima jazosi tayinlangan.
Sud ayblanuvchilarga nisbatan jazo tayinlashda ularning aybiga iqrorligi bilan birga, oilaviy va moddiy sharoiti og‘irligini, shuningdek, huquqbuzarlikning jamoat joyida sodir etilganini inobatga olib, ma’muriy qamoq jazosini qo‘llashni lozim deb topgan. Ular qamoqda saqlash bilan bog‘liq xarajatlardan ozod qilingan.
Izoh (0)