Toshkent shahri Mirzo Ulug‘bek tumanida Activist loyihasi muallifi, bloger Hojiakbar Nosirov boshqaruvida bo‘lgan BYD avtomobili yo‘l-transport hodisasiga uchradi.
Blogerning so‘zlariga ko‘ra, u soatiga 61 kilometr tezlikda ketayotganida orqasidan bir yo‘nalishdagi Monza yuqori tezlikda uning mashinasiga urilgan. Hojiakbar Nosirovning o‘ziga jarohat yetmagan, mashina texnik shikastlangan.
Toshkent shahri Yo‘l harakati xavfsizligi boshqarmasiga ko‘ra, soat 22:20 atrofida Yangi O‘zbekiston ko‘chasida 19 yoshli haydovchi I.Q. boshqaruvidagi Monza, 27 yoshli Hojiakbar Nosirov boshqaruvidagi BYD va 31 yoshli A.A. boshqaruvida bo‘lgan Cobalt avtomashinalari to‘qnashgan.
“YTH natijasida tan jarohat olganlar yo‘q. Holat yuzasidan Toshkent shahar IIBB YHXB mas’ul xodimlari tomonidan surishtiruv harakatlari olib borilmoqda”, — deyiladi xabarda.
Activist ishi
2023-yil 8-aprel kuni jinoyat ishlari bo‘yicha Shayxontohur tuman sudida Hojiakbar Nosirovga Maʼmuriy javobgarlik to‘g‘risidagi kodeksning 184-3-moddasi (milliy, irqiy, etnik yoki diniy adovatni targ‘ib qiluvchi materiallarni tayyorlash, saqlash yoki tarqatish) va 194-moddasi (ichki ishlar organlari xodimining qonuniy talablarini bajarmaslik) 1-qismi bo‘yicha yuritilgan maʼmuriy ish ko‘rib chiqilgandi.
Shayxontohur tuman Ichki ishlar organlari faoliyatini muvofiqlashtirish bo‘limi TQKB xodimlari tomonidan Toshkent shahrida diniy muhitni sog‘lomlashtirish borasida olib borilayotgan ijtimoiy tarmoqlarda monitoring tadbirlari davomida, u o‘ziga tegishli bo‘lgan Activist kanali orqali har xil turdagi diniy mazmundagi videolarni, yaʼni Din ishlari bo‘yicha qo‘mitaning 2023-yil 7-apreldagi xulosasiga asosan aholi orasida turli ixtilof va tushunmovchiliklar keltirib chiqarishi mumkin bo‘lgan g‘oyalarni tarqatgani aniqlangan.
Bundan tashqari, ish hujjatlariga ko‘ra, bloger IIO xodimlarining hujjatlarini tekshirish uchun taqdim etish, tushuntirish berish va ish hujjatlari bilan tanishib chiqish kabi qonuniy talablarga bo‘ysunmagan. Unga sud majlisida huquqbuzar tariqasida so‘roq qilish uchun so‘z berilganida huquqbuzar va himoyachisi holat yuzasidan ko‘rsatma berishdan bosh tortgan.
U ko‘rsatma berishdan bosh tortgan bo‘lsa-da, uning yuqoridagi huquqbuzarliklarni sodir etgani ish hujjatlaridagi IIO FMB xodimining bildirgisi, dalolatnoma, ko‘zdan kechirish va elektron materiallarni olish bayonnomasi, Activist kanalidan olingan fotolavhalar, DVD-R diskidagi videolavhalar, ashyoviy dalillarni olish bayonnomasi, hamda Din ishlari bo‘yicha qo‘mitaning ekspertlik xulosasi va boshqa dalillar bilan o‘z tasdig‘ini topgan.
Sud qarori bilan X.N. Maʼmuriy javobgarlik to‘g‘risidagi kodeksning 184-3-moddasi va 194-moddasi 1-qismida nazarda tutilgan huquqbuzarlikni sodir etganlikda aybli deb topilib, unga nisbatan 15 sutka maʼmuriy qamoq jazosi tayinlangan edi.
Izoh (0)