Toshkent davlat iqtisodiyot universiteti talabasi, 21 yoshli Jahongir Ulug‘murodov Telegram guruhda diniy mazmundagi nashida tarqatgani uchun 3 yilga ozodlikdan mahrum qilish jazosi tayinlangani haqida xabar berilgan edi. Jahongir Ulug‘murodovning telefon raqamiga ochilgan Telegram’da o‘zbek tilidagi “Shahid bo‘lib ketsak rozi bo‘lingiz” nomli “jihod” va “hijrat”ga daʼvat qiluvchi diniy mazmundagi nashidalarni 10 nafar aʼzosi bo‘lgan “Alhamdulillah” nomli guruhga tarqatgani aniqlangan. Din ishlari bo‘yicha qo‘mitaning xulosasiga ko‘ra, guruhdagi materiallar taqiqlangani qayd etilgan.
Sud unga nisbatan Jinoyat kodeksining 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “g” bandi bilan Jinoyat kodeksining 57-moddasi (yengilroq jazo tayinlash)ni qo‘llab, 3 yil muddatga ozodlikdan mahrum qilish jazosi tayinlangan.
Mazkur holat keng jamoatchilik tomonidan e’tirozlarga sabab bo‘ldi. Hususan, faollar talabaning yoshligi, do‘stlariga yuborgan nashidaning maʼnosini tushunmay shu ishni qilgani va berilgan jazo o‘ta og‘irligini qayd etishgan.
Sud jarayonini kuzatgan bloger Olimjon Haydarovning yozishicha, Jahongir 2022-yilning oktabr oyida YouTube‘da nashida eshitib qolgan (maʼnosini tushunmagan, chiroyli musiqasini yoqtirgan), saqlamagan, shunchaki qo‘shiq linkini 10 nafar sinfdoshlari bo‘lgan Telegram guruhiga tashlagan.
“Birorta guruh aʼzosi linkni ochmagan, qiziqmagan ham (guvohlik va tushuntirish xatlari bor). Hammalari IIB binosiga olib kelingach, u linkdagi qo‘shiq nashida ekanini bilishgan. Yaʼni Jahongirni harakati hech qanday ijtimoiy xavf tug‘dirmagan”, — degan bloger.
Jahongir Ulug‘murodovning onasi Gulchehra Umarova Prezident, Oliy sud va tegishli tashkilotlardan o‘g‘liga yengillik berishini so‘rab jamoatchilikka murojaat qilib chiqdi.
Onaning aytishicha, o‘g‘li Jahongir holati bo‘yicha ichki ishlar bo‘limiga chaqirilgan. Keyinchalik uning telefoni ko‘zdan kechirilganida diniy mazmundagi materiallar borligi aniqlangan.
“Kuz oylari edi. Ikki yigit uyimizga kelib dachada o‘g‘irlik bo‘lgani Jahongir ismli shaxslar bu ishni qilgan bo‘lishi mumkin, deb o‘g‘limni ham so‘roqqa chaqirishdi. O‘g‘lim hali ichki ishlar bo‘limidan kelmasidan, kech tunda o‘rtog‘ining ota-onasi uyimizga keldi. Ular Jahongir do‘stlariga nashida tarqatibdi, deb janjal qilishdi. Men gap nima haqida ketayotganini tushunmay qoldim.
Jahongir bir soatlar ichida keldi. Undan nima edi deb so‘rasam, “Men ham nima ekanligini bilmayman, qo‘shiq deb eshitgandim”, dedi. Shundan keyin bolamni fevral oyida chaqirishdi. O‘shandan buyon Jahongirni ochiqda qaytib ko‘rmadim. Faqat tergov payti ikki marta borib ko‘rdim. Keyin tergovga advokat chaqiradi, deb aytishdi. Lekin davlat tomonidan berilgan advokat bizni chaqirmadi. Shundan keyin uni sud payti ko‘rdim.
Advokatga tergov paytida ishlagani uchun 3 million, sud paytida qatnashgani uchun esa 3 million so‘m berdim. O‘zimiz advokat olishga qurbimiz yetmaydi. Suddan oldin advokat bilan ikki marta ko‘rishganman. U, “Bolangizni olib chiqib berolmayman, lekin yilini kamaytirib beraman”, deb aytdi. Ikki marta gaplashganimizda ham, sud kuni ham shu gapni qaytardi”, — dedi Gulchehra Umarova.
Gulchehra Umarova tarqatilgan nashidaga o‘xshagan materiallarni eshitish mumkin emasligi haqida kamroq targ‘ibot qilinganidan norozilik bildirgan. Uning alohida taʼkidlashicha, o‘g‘li arab tilini bilmaydi.
“Sud boshlandi. Tergov qilingan hamma bolalarning fikri bir xil bo‘lib chiqdi. Sudya bolalarga “Bu qo‘shiqni avval eshitganmisizlar”, deb savol berdi. Ular eshitmaganliklarini, faqat tergov payti qo‘yib berishganini aytishdi.
Mahalla raisi sudga o‘g‘limni kafillikka olamiz dedi. Ishlagan va o‘qigan joyi ham Jahongir haqida yaxshi maʼlumot berishdi. O‘g‘lim yomon bola emasligini, bilmay shu ishni qilganini aytishdi. Bolam “Bilmagan ekanman”, deb sudda ham kechirim so‘radi.
Hurmatli Prezident, Oliy sud, ichki ishlar vazirliklaridan yordam berishlarini so‘rayman. Jahongirga bir imkon beringlar. Bu menga ham berilgan imkon bo‘ladi!”, — dedi ona.
Toshkent viloyati IIBB axborot xizmati ijtimoiy tarmoqlarda ayrim elektron ommaviy axborot vositalari va virtual makon foydalanuvchilari orasida “tanishlariga oddiy diniy qo‘shiq — nashida tarqatgan talaba qamaldi” mazmunidagi noxolis maʼlumotlar tarqalayotgani yuzasidan munosabat bildirdi.
Izoh (0)