Kuni kecha muhtasham “Xalqlar do‘stligi” saroyida yurtimizning barcha san’atkorlari jamuljam bo‘ldi. 1998-yildan beri o‘tkazib kelinayotgan va bir muddat taqiqqa uchragan ushbu tadbirda ko‘zga ko‘ringan san’at va madaniyat vakillari, sport va so‘z ustalari hamda ilm-fan homiylari munosib taqdirlanadi. Qizil yo‘lakcha, muxlislar, olqish-u e’tirofdan san’atkorlar mamnun bo‘ldi, bu esa kechaning ajoyib kayfiyatda o‘tishiga katta hissa qo‘shdi.
Tadbir qizil yo‘lakchadan birin-ketin el ardog‘idagi sportchi va san’atkorlarning o‘tishi bilan boshlandi. San’at saroyiga kirib kelgan har bir mehmonni tadbir tashkilotchilari va muxlislar qarsaklar bilan kutib oldi.
Tadbirni iste’dodli boshlovchilar Nilufar Sotiboldiyeva, Jamshid Umrzoqov va Sitora Farmonova olib bordi.
— “Har yili bo‘ladigan ushbu anjuman juda go‘zal tarzda o‘tadi. Odamlar buni orziqib kutadi, sababi sevgan san’atkori o‘zining ijodi, chiqishi bilan ularning ko‘z o‘ngida namoyon bo‘ladi. Bunday tadbirlar davomiy bo‘lishi tarafdoriman. Albatta, tashkillashtirishda juda katta mehnat turibdi. “Zamin yulduzlari” hozirda eng kerakli anjumanlardan biri. Rejissyor Sa’dullaxonga rahmat, bunday tadbirlarni o‘tkazishdan charchamasin. Bugun mustaqilligimizga bag‘ishlangan “O‘zbek kelayotir” nomli qo‘shig‘imni xalqimiz bilan ijro etaman”, deydi 73 yoshni qarshilagan san’atkor G‘ulomjon Yoqubov.
— “ ‘Zamin yulduzlari’da ilk bor ishtirok etishim. Kecha ajoyib o‘tyapti, ayniqsa, qizil yo‘lakcha menga juda yoqdi. Shunday buyuk ustozlar bilan bir yo‘lakchadan o‘tganimdan faxrlanyapman va biroz xijolatdaman ham. Hayajonimning cheki yo‘q. Ijodim borasida yangiliklar bor, bu oyda ikkita yangi qo‘shig‘im chiqadi. “Anora” nomli serialda ham rol ijro etyapman, hozir suratga olish ishlari bilan bandman. Yil yakuniga qadar e’tiborimni ko‘proq musiqaga qarataman”, dedi bloger Yunetta Akopyan.
Duet kuylash imkoni bo‘lsa, qaysi xonandalar bilan kuylashni istaysiz degan savolga Yunetta quyidagicha javob berdi:
— “Lola va Munisa Rizayeva bilan. Yana Shohruh reper va Shahriyor ham juda yoqadi. Agar ovozim to‘g‘ri kelib, ular bilan qo‘shiq aytsam, katta orzularimdan biri amalga oshgan bo‘lardi”, deydi havaskor xonanda.
— “G‘oya muallifi rejissyor Sa’dulla Abdullayev yaxshi ishga qo‘l urgan. Chunki ona zaminning barcha san’atkorlari bir joyda jamuljam bo‘lishi tarixda qolarli voqea. Allohning nazariga tushgan yurtimiz doim tinch bo‘lsin, osoyishta mamlakatga mana shunday tadbirlar, xursandchiliklar yarashadi. Bu yerda qo‘shiq aytishdan ham burun muxlislar, hamkasblar bilan diydorlashgani kelamiz. Shuning o‘zi sahnada qo‘shiq aytishdan-da ortiq baxt”, dedi Abdulla Qurbonov.
Mehmon sifatida nafaqat san’atkorlar, balki taniqli blogerlarning ham taklif etilishi tadbirga o‘zgacha fayz qo‘shdi. Muxlislar sevimli ijodkorlari bilan suratga tushish baxtiga muyassar bo‘ldi.
Hali hanuz go‘zalligini yo‘qotmagan Ra’no Shodiyeva sahnaga chiqqanida, ustoz san’atkorlardan biri “Bu Ra’noning o‘zimi yo qizimi?”, deya hazillashib, aktrisaga iliq tilaklar bildirdi.
To‘liq reportajni YouTube’dagi “Daryo Lifestyle” kanalida tomosha qiling.
Izoh (0)