Qashqadaryo viloyatida bir qarzdorlik uchun ikkita ijro varag‘i chiqarildi. Bu haqda “Daryo”ga viloyatda faoliyat yurituvchi MCHJlardan birining ishonchli vakili xabar berdi.
2024-yil 20-sentyabr kuni ATB “Agrobank” Chiroqchi tuman filiali Qarshi tumanlararo iqtisodiy sudining 4-1801-2203/1242-sonli hal qiluv qaroriga asosan berilgan ijro varaqasini yo‘qotib qo‘yilganligi uchun dastlabki instansiya sudining hal qiluv qarori ijrosi bo‘yicha berilgan ijro varaqasi dublikatini so‘rab ariza bergan.
Mazkur ariza 2024-yil 3-oktyabr kuni soat 10:00 da ko‘rib chiqilgan. Bu vaqtda Chiroqchi tumani iqtisodiy sudida sudya Latipov raisligida xususiy amaliyot bilan shug‘ullanuvchi notarius Saodat Rahimovaga nisbatan taqiqni yechish majburiyati yuklash haqidagi da’vo arizasi ham ko‘rilayotgan edi. Da’voda ATB “Agrobank” qo‘shimcha javobgar sifatida qatnashayotgan bo‘lgan.
Eng qiziq holati shuki, Chiroqchi tumani iqtisodiy sudida bu ish muhokamasi vaqtida ATB “Agrobank” vakili Begaliyev tomonidan sud majlisida Qarshi tumanlararo iqtisodiy sudining 4-1801-2203/1242-sonli ijro varaqasi asosida MIBning viloyat boshqarmasi davlat ijrochisi Bobur Panjiyevning ijro ishini qo‘zg‘atish haqidagi qarori taqdim etildi.
Aslida ijro varaqasi mavjud bo‘lmaganligi sababli undan to‘rt kun avval dublikat olish uchun ariza bergan. 2024-yilning 24-sentyabr kuni MIB Qashqadaryo viloyati boshqarmasi tomonidan (yo‘q, mavjud bo‘lmagan ijro varaqasiga) Qarshi tumanlararo iqtisodiy sudining 4-1801-2203/1242-sonli ijro varaqasi bo‘yicha 18002400031901-raqamli ijro ishi qo‘zg‘atilgan. Bu holat esa Chiroqchi tumani iqtisodiy sudi tomonidan “Dov Ufq Energy” MCHJning xususiy amaliyot bilan shug‘ullanuvchi notarius Saodat Rahimovaga nisbatan taqiqni yechish majburiyati yuklash haqidagi da’vo arizasini rad etishga asos bo‘ldi, deydi MCHJning ishonchli vakili.
Ta’kidlanishicha, sud majlisi tugagandan so‘ng MCHJ mas’ullari MIB davlat ijrochisi Bobur Panjiyev va boshqarma boshlig‘i o‘rinbosari huzuriga kirib, ijro varaqasi aslini so‘ragan.
Hamda belgilangan tartibda yuqori turuvchi rahbarga va viloyat prokuraturasiga shikoyat kiritdik. Keyingi so‘rovlarimizga ko‘ra (aslida mavjud bo‘lmagan ijro varaqasi) ATB “Agrobank” viloyat boshqarmasi boshlig‘i A.Ashurovning 2024-yil 25-sentyabrdagi № 118-sonli MIB viloyat boshqarmasiga bergan xatiga asosan ijro varaqasi “Sud hujjatlari va boshqa organlar hujjatlarini ijro etish to‘g‘risida”gi qonunning 40-moddasi 1-qismiga asosan qaytarib olinganligi ma’lum bo‘ldi.
Shundan so‘ng davlat ijrochisi tomonidan 2024-yilning 27-sentyabr kuni ijro ishini yuritishni tamomlash va ijro hujjatini undiruvchiga qaytarish to‘g‘risida qaror qabul qilingan. Afsuski bu nayranglar “Agrobank” va MIBchilar o‘rtasida o‘ylab topilib, Chiroqchi tumani iqtisodiy sudining 4-1807-2401/1694-sonli iqtisodiy ishi bo‘yicha da’vo arizaning rad etilishi uchun “yasalgan” soxta hujjat ekan. Davlat organlari ayrim vakillarining bu kabi o‘yinlari tugamas ekan, qonuniylik va qonun ustuvorligini mustahkamlab bo‘lmaydi, deydi suhbatdosh.
Qo‘shimcha qilinishicha, 2024-yilning 15-oktyabr kuni Qarshi tumanlararo iqtisodiy sudi yana ijro varaqasining dublikatini berish bo‘yicha ajrim chiqargan.
Biz da’vo qilganda ijro varaqasi bor edi, bank dublikat olish uchun ariza berganda esa yo‘q bo‘lib qoldi. Eng qizig‘i sudlar ikkala holatda ham bizga emas bankka ishondi. Bank esa ularni aldadi, deydi u.
Izoh (0)