Sem Bankmen-Frid o‘zining kriptovalyuta birjasi FTX inqirozidagi roli uchun 25 yillik qamoq jazosiga hukm qilindi. Bu haqda Financial Times xabar berdi.
Xabarga ko‘ra, u pul tikish uchun mijozlar mablag‘laridan milliardlab dollarlarni o‘g‘irlash orqali katta zarar keltirgan.
O‘tgan yili yettita firibgarlik va pul yuvishda ayblangan 32 yoshli Sem o‘z harakatlari jinoyat ekanligini bilardi, — dedi sudya Luis Kaplan 28-mart kuni Manxetten federal sud majlisida.
Bankmen-Frid hukm e’lon qilinishidan oldin biroz afsusda ekanligini aytgan.
Bankmen-Frid eng mashhur kriptovalyuta rahbarlaridan biri bo‘lgan. FTX kompaniyasi 2022-yil noyabr oyida bankrotlik to‘g‘risida ariza bergan. Bir yil o‘tib, Bankmen-Frid aybdor deb topilgan.
Nyu-Yorkning janubiy okrugi bo‘yicha AQSH advokati Damian Uilyamsning aytishicha, Bankmen-Frid tarixdagi eng yirik moliyaviy firibgarliklardan birini uyushtirib, mijozlarining 8 milliard dollardan ortiq pulini o‘g‘irlagan.
Sobiq kripto qirolining advokatlari uni olti yarim yildan ko‘p bo‘lmagan muddatga qamoq jazosiga hukm qilishni so‘rashgan. Prokurorlar Bankmen-Frid ertaroq qo‘yib yuborilsa, yana jinoyat sodir etishi mumkinligini da’vo qilib, 50 yilgacha qamoq jazosini talab qilgan.
Hisob-kitoblarga ko‘ra, FTX investorlari 1,7 milliard dollar, kreditorlar 1 milliard dollar va mijozlar 8 milliard dollar yo‘qotgan. Bankmen-Fridning advokatlari 11 milliard dollarlik zararni qoplash to‘g‘risidagi qarorni o‘z ichiga olgan hukm ustidan appelyatsiya berishni rejalashtirishgan.
Izoh (0)