11-yanvar kuni Andijon viloyati Asaka tumanidagi avtoshohbekatda o‘zboshimchalik bilan qurib olingan savdo do‘konini buzish uchun kelgan MIB xodimlari va do‘kon egasining o‘g‘li Saidmaqsudxon Jumayev o‘rtasida kelishmovchilik yuz bergan. Natijada Saidmaqsudxon Jumayev oshxona pichog‘i bilan taraflarni qo‘rqitib, davlat ijrochisi X.M.ga tan jarohati yetkazgan. Shundan so‘ng ehtiyot chorasi sifatida fuqaro qamoqqa olingan.
“Daryo” muxbiri holat yuzasidan surishtiruv olib bordi.
Fuqarolik ishlari bo‘yicha Asaka tumanlararo sudi raisi Erkinjon Sobirovning ma’lum qilishicha, 2021-yilning 21-sentabr kuni sud binosida da’vogar Asaka tumani hokimligining javobgar Avliyoxon Jumayevga nisbatan “O‘zboshimchalik bilan qurilgan noqonuniy qurilmani majburiy tartibda buzdirish haqida”gi da’vo arizasi ko‘rib chiqilgan. Qarorda avtobekatning yo‘lovchilar uchun mo‘ljallangan kutish joyiga o‘zboshimchalik bilan qurib olingan savdo do‘koni javobgar hisobidan majburiy tartibda buzdirilishi belgilangan.
“Sud majlisida Asaka tuman hokimligining ishonchli vakili Xotam Qurbonov javobgar tomonidan Asaka tumandagi Najmiddin Kubro ko‘chasida joylashgan avtobekatda o‘zboshimchalik bilan savdo do‘koni qurilib, foydalanib kelinayotganligini, berilgan ogohlantirishga qaramasdan noqonuniy qurilma javobgar tomonidan ixtiyoriy ravishda buzilmaganligini bildirib, mazkur noqonuniy qurilgan do‘konni javobgar hisobidan majburiy tartibda buzdirishni so‘ragan.
Javobgar Avliyoxon Jumayev sud majlisining vaqti va joyi to‘g‘risida tegishli tarzda xabardor qilingan bo‘lishiga qaramasdan, sudga kelmaganligini va buni uzrli sabablarini sudga taqdim qilmaganligini, ishni o‘zining ishtirokisiz ko‘rishni so‘ramaganligini da’vogar vakilining ishni ko‘rilishiga e’tirozi yo‘qligini inobatga olib, sud ishi ko‘rib chiqilgan.
Da’vogar tomon Asaka tuman qurilish bo‘limining 2021-yil 25-iyundagi xulosasi, o‘zboshimchalik bilan qurilgan imoratlarni aniqlash hamda bartaraf etishni tashkil etish bo‘yicha tuzilgan dalolatnoma, javobgarga berilgan ogohlantirish xatlarini taqdim qilgan.
Unga ko‘ra, savdo do‘koni va avtobekat javobgar Jumayev Avliyoxonga notarial tasdiqlangan shartnomaga asosan tegishli bo‘lib, mulk huquqi davlat ro‘yxatidan o‘tkazilgan bo‘lsa-da, bekat qismi yo‘lovchilar uchun kutish joyi sifatida ochiq qoldirilib, savdo do‘koni shaharsozlik me’yorlari va qoidalari talablari asosida qurilmaganligi aniqlangan.
Sirtdan hal qiluv qaroriga asosan da’vogar Asaka tuman hokimligining javobgar Jumayev Avliyoxonga nisbatan da’vo arizasi qanoatlantirilgan hamda avtobekatning yo‘lovchilar uchun mo‘ljallangan kutish joyiga o‘zboshimchalik bilan qurib olingan savdo do‘koni javobgar hisobidan majburiy tartibda buzdirilishi belgilangan”, — deydi sudya Erkinjon Sobirov.
Sudyaning qo‘shimcha qilishicha, javobgar sirtdan chiqarilgan qarorni bekor qilishni so‘rab, ariza bilan murojaat qilgan.
“Murojaat qilganda qarorni sirtdan qabul qilingan qarorni noto‘g‘ri chiqarib qo‘ygan bo‘lsak, deb to‘g‘rilab qo‘yish uchun qayta ko‘rib chiqqanmiz. Shunda Jumayevning o‘zi kelib ‘Mening hujjatlarim bor, siz meni buzdirishga belgilab qo‘yibsiz’ dedi. Unga javoban ‘Hujjatingiz borligini bilaman, lekin u yer nima desam ‘ostanovka’, dedim. Keyin muhokama qilish jarayonida ikkalamiz suddan nari joyni ko‘rish uchun chiqib ketdik. Borganda odamlar o‘tiradigan joy akfa qilinib, berkitib qo‘yilgan, eshiklar qulf edi. O‘sha yerning o‘zida ‘Hujjatim bor, hamma narsam joyida deyapsiz, lekin bu yerga kelgan fuqarolar qayerda o‘tiradi? Misol uchun men yo‘lovchiman deylik, avtomashina kutish uchun qayerda o‘tiraman’, degan savollar bilan murojaat qildim. ‘Bolalar eshikni berkitib qo‘yibdi’, deganda ‘Bekat uchun eshikni nima keragi bor’, dedim. Ichkariga kirganimizda aroq va sigaretni hidi tutab, tartibsiz holatda edi. Qisqasi ularga akfa eshiklarni olib tashlab, bekatning old qismini ochishini, ichkaridagi mebellar o‘rniga taxta stullarni qo‘yishini, devorga ilingan televizorini olib tashlashini aytdim. Qarorni o‘sha yerda o‘qib berganimda sirtdan hal qiluv qarori to‘g‘riligiga ishonch hosil qildi. Shundan keyin uning arizasi rad etilib, qaror ijrosi ta’minlanishi belgilandi”, — deydi Erkinjon Sobirov.
Do‘kon egasi Avliyoxon Jumayevning “Daryo”ga ma’lum qilishicha, do‘konini 26 yil avval sotib olib, qonuniy hujjatlashtirilgan.
“Bekatning ortida 10 ga yaqin do‘kon bor. Bizning do‘kon ularni to‘sib qolgan. Qo‘shni do‘kon egasi ancha boy odam, bizni yo‘qotish maqsadida ustimizdan yozaverib charchamadi. Bundan uch-to‘rt yilcha avval noqonuniy qurib olgan deb qandaydir tanishlari orqali do‘konni buzdirib ham yuborgandi. O‘shanda bu bekatning faqatgina tomi qolgandi. Keyin esa tomini ham buzdirish payiga tushishdi. Tuman prokuraturasiga borib barcha hujjatlarni ko‘rsatdim. Shundan so‘ng do‘konni yana qayta qurib olishimga ruxsat berishdi. Binoni o‘zlari aytgandek qurdim. Lekin bekatning bu qismini ham akfa eshik bilan berkitib qo‘yganim uchun yana janjallar boshlandi.
Rosti, bu yerning bir burchagini Paynet uchun bergandim. Endi esa MIB kelib hammasini buzasan deb turibdi. Hokimni muovini kelib,‘Oynalarga yopishtirilgan reklama bannerlarini olib tashlang, ichkariga esa qattiq stollar qo‘yib qo‘ying’ dedi. Hammasini qildik. O‘sha voqea yuz bergan kuni MIB xodimi kelib, otangni qamataman degan ekan, o‘g‘limni jahli chiqib pichoq bilan uni quvlagan. Bor gap shu”, — deydi Avliyoxon Jumayev.
Jumayevning o‘g‘li Saidmaqsudxonning aytishicha, binoning bekat qismini toza tutish uchun alyumin eshiklar qo‘yilgan. Bunga hokimning birinchi o‘rinbosari ruxsat bergan.
“Necha yillardan buyon do‘kondan foydalanib kelayotgan bo‘lsak, yonidagi kutish qismida har xil mast-alast odamlar kelib o‘tirib olganini, bu yerda ichkilik ichishlarini har kuni guvohi bo‘lardik. Ertasiga ertalab ayolim bilan kelib ularning qoldiqlarini tozalash jonimizga ham tegdi. Oxiri bu yerni akfa eshigi bilan berkitishni, kunduzi eshiklarni ochib qo‘yib, kechasi uyga qaytayotganda berkitib qo‘yishni o‘ylab qoldik. Mana, ko‘rib turganingizdek bekatning bu qismi hozir aynan shunday. Biz bu yerdan foyda olmaymiz. Buni tuman hokimining birinchi o‘rinbosari ham kelib ko‘rib ketgan. O‘zi ruxsat bergan”, — deydi u.
Saidmaqsudxon Jumayevning ta’kidlashicha, MIB xodimlaridan biri otasi nomiga haqoratomuz so‘zlar aytgani uchun janjal boshlangan.
“O‘sha kuni MIB xodimlari, mahalliy hokimiyat vakillari, kadastr hamda uchastka noziri kelib, shu do‘konni buzishimni va avtobekatni o‘z holiga keltirib qo‘yishimni aytishdi. Hech qanday qarshiliklarsiz ishga tushdim. Jarayonlarni ko‘rgach, ular ketdi. Bir muddat o‘tgach, ikki nafar MIB xodimi keldi. Ular o‘zini tanishtirmadi. Yonimga kelib, bu yer o‘zi to‘liq buzilishi kerakligini aytib, nega mendan bu reklama banerlarni olayotganimni so‘rashdi. Ularga javoban ertalab hamma vakolatli organ vakillari kelganini, menga shunday topshiriq berganini, do‘kondagi reklamalarni olib tashlab, yumshoq o‘rindiqlar o‘rniga qattiq stullar qo‘yishimni aytishganini tushuntirdim. U esa birdaniga “Bularga jarima solish kerak, jinoiy ish qo‘zg‘ash kerak” deb otam haqida nomaqbul so‘zlarni gapirdi. Shundan keyin o‘zimni yo‘qotib qo‘ydim. Sakson yoshdan oshgan otam haqida yomon gapirganiga chidab turolmadim. Shu yoshimda yana otamga gap olib beramanmi, degan xayol o‘rnashib qoldi miyamga. Shundan keyin tortishib ketdik. Qo‘limdagi xo‘jalik pichog‘i bilan uni quvladim. To‘g‘risi, o‘zimni qo‘lga ololmay qoldim o‘sha payt”, — deya Saidmaqsudxon holatga izoh berdi.
“Daryo” muxbiri voqea yuzasidan do‘kon egalari aytayotgan gaplar qanchalik haqiqatga to‘g‘ri kelishi haqida ma’lumot olish uchun MIB viloyat boshqarmasi axborot xizmati rahbari Oyistaxon Abdurahmonova bilan bog‘landi.
“Voqea yuz bergandan so‘ng ijrochi kelib, bo‘lim boshlig‘iga holat bo‘yicha hech narsa aytmagan. Biroq javobgar tomon tuman prokuraturasiga holat bo‘yicha ariza bilan murojaat qilgan. Murojaat asosida prokuratura xodimlari ijrochini chaqirtirib, holatni o‘rganishgan. O‘shanda ijrochi bo‘lgan voqeani batafsil aytib bergan”, — dedi MIB matbuot xizmati.
Oyistaxon Abdurahmonovaning qo‘shimcha qilishicha, tuman prokuraturasi ko‘rib chiqilayotgan ish tergov jarayonidaligi sababli MIB xodimlariga jurnalistlar savollariga javob berishini taqiqlagan.
“Daryo” voqealar rivojini kuzatib boradi.
Izoh (0)