Qozog‘istonning Olmaota viloyatidagi Talgar shahri meri Baxit Kurishbekov va uning o‘rinbosari 16 yoshli o‘smirning shov-shuvli o‘limi ortidan o‘z lavozimlaridan chetlashtirildi. Marhumning o‘limi ortidan Talgar shahriga Milliy gvardiya olib kelingan. Bu haqda Tengrinews xabar berdi.
“Vazifalarini lozim darajada bajarmagani uchun Talgar shahar hokimi Qurishbekov Baxit Kuatbekovich, hokim o‘rinbosari Matan Sag‘indiq egallab turgan lavozimidan ozod etildi”, deyiladi xabarda.
Kurishbekov 2022-yil iyun oyida shahar hokimligiga saylovda g‘alaba qozongandi. Hokim ishdan bo‘shatilishidan oldin 4-oktyabrga o‘tar kechasi Talgar do‘konlaridan birida o‘smirning shov-shuvli o‘ldirilishi sodir bo‘lgan. O‘sha kuni mahalliy do‘konga tajovuzkor kayfiyatdagi xaridor kelgan, u bilan xodimlar o‘rtasida janjal boshlangan. O‘smir shu payt do‘konga otasining oldiga kelgan.
Mojaro avj olgach, mijoz o‘z tanishlarini chaqirgan — ularning barchasi sovuq va o‘qotar qurollar bilan qurollangan. Voqea joyiga yetib kelgach, ular o‘smirga, uning otasi va amakisiga hujum qilgan. Oqibatda o‘smir halok bo‘lgan.
O‘g‘lini o‘ldirishayotganda, onasini ikki kishi ushlab turgan. Ona o‘g‘lini urmasliklarini yolvorib so‘ragan. Amakisiga ham pichoq bilan jarohat yetkazishgan. Buvisini bir chetga itarib yuborishgan, shundan so‘ng u hushidan ketgan. Marhumning otasi ikki kishi bilan olishgan, faqat ulardagina pichoq bor deb o‘ylagan. Ammo, afsuski, hammasi qurollangan bo‘lgan. Qotillikdan keyin ular do‘konni ham talashgan, deydi marhumning qarindoshlari.
12-oktyabr kuni halok bo‘lgan o‘smirning uyi yoqib yuborilgan. Shu munosabat bilan bolaning oilasini himoya qilish maqsadida politsiya xodimlari tomonidan kecha-yu kunduz navbatchilik tashkil etilgan.
Ushbu ish bo‘yicha tergovni ichki ishlar vaziri Yerjan Sadenov shaxsan nazoratga olgan, Talgarga esa Qozog‘iston Ichki ishlar vazirligi Milliy gvardiyasining shaxsiy tarkibi yuborilgan. Olmaota viloyati prokuraturasining ma’lum qilishicha, jinoyat sodir etishda gumon qilingan yetti nafar shaxs qo‘lga olingan. Sud ularni ikki oyga qamoqqa olish haqida qaror chiqardi.
Halok bo‘lgan o‘smirning otasi Qarjaubay No‘rimov prezident Qosim-Jo‘mart To‘qayevdan o‘z oilasini Olmaota viloyatidan olib chiqib ketishni so‘ragan.
Izoh (0)