Bett Gremm

90-yillar boshida ruchkani o‘chiruvchi maxsus vosita ixtiro qilinmagan edi. Yozuvdagi xatoni to‘g‘rilashning yagona usuli uni qayta pechatlash mashinasida yozish edi. Ajrimdan so‘ng Xyustondan notanish Dallasga ko‘chib kelgan Bett mashinada yozuvchi-kotiba sifatida ish boshladi. Uning vazifasi yozuv mashinasida turli hujjatlar matnini terish bo‘lgan. Ish kunlarining birida Gremm lawful (qonuniy) so‘zining o‘rniga awful (yomon) deb adashib yozib qo‘ygan. Xatoni to‘g‘rilashga esa uzoq vaqt ketar edi. Uzoq o‘ylab, ertasi kuni u ofisga emulsiyali oq bo‘yoq va cho‘tka bilan kirib keldi.

Korrektorlik ishi bo‘yicha ilk tajriba besamar bo‘lgach, Bett bo‘yoqqa tuz, suv, soda kabi kimyoviy mahsulotlar qo‘shib, tajriba qila boshladi va yaxshi natijaga erishdi. Shu tariqa liquid paper — ruchkani o‘chiruvchi bo‘yoq ixtiro qilindi. Korrektor-bo‘yoq keyinchalik takomillashtirilib, ishlab chiqarilish yo‘lga qo‘yildi. Farzandini yolg‘iz katta qilayotgan ona shu tariqa moliyaviy tashvishsiz keksalik va o‘g‘li uchun porloq kelajakka poydevor qurdi.

Joy Mangano

Bu ayolning taqdiri “Joy” nomli film efirga uzatilgandan so‘ng keng jamoatchilikka ma’lum bo‘lgan. Turmush o‘rtog‘i bilan ajrashgan Mangano kichkina kvartirada uch farzandi bilan yolg‘iz yashar edi. Bir kuni u tasodifan shisha idishni sindirib qo‘yadi va yerdagi shisha parchalarini tozalash vaqtida qo‘lini shikastlaydi. Shunda ayolning xayoliga ajoyib fikr keladi va Mangano suvini siqish uchun qo‘llar bilan pol lattaga teginishga hojat bo‘lmagan Miracle mop nomli polyuvgichni o‘ylab topadi.

Oradan bir necha oy o‘tib esa Joy ro‘zg‘or buyumlari o‘rin olgan do‘kon ochadi. Teleekran orqali o‘z mahsulotining afzalliklari haqida aytib berganidan keyin 18 ming dona polyuvgich sotishga muvaffaq bo‘ladi. 2 yil o‘tib esa yillik daromadi 1 million dollarni tashkil qiladigan kampaniya egasiga aylanadi.

Foto: Marie Claire
Sheri Shmelzer

Sheri ismli ayol million dollarlik g‘oyani kutilmaganda o‘ylab topgan. Uning farzandlari teshikli shippaklarni yaxshi ko‘rardi. Ayol bolalarining poyabzallarini qiziqarli bo‘lishini istab, teshiklarni turli predmetlar: gul, tugma va loydan yasalgan shakllar bilan bezay boshlaydi. Bolalari maktabga kiyib borganidan keyin poyabzallar boshqa o‘quvchilarga ham yoqib qoladi va ularning ota-onalari shippaklarini xuddi shunday bezab berishni iltimos qiladi.

Sheri ijod namunalarini jibbits deb nomlaydi va keyinchalik yerto‘lada o‘zining kichik ishlab chiqarish sexini ochadi. Avvaliga donasi 3 dollarga sotilgan jibbitslar bir necha yil o‘tib butun dunyoga mashhur bo‘lib ketadi. Shmelzer esa o‘z mahsulotini Crocs kampaniyasiga 20 million dollar evaziga sotib yuboradi.
Juli Din

Buyuk Britaniyaning The Cambridge Satchel Company brendi tashkil etilganiga 10 yildan oshmagan. Mazkur kampaniya portfel ko‘rinishidagi sumkalar ishlab chiqaradi. Cambridge satchel nomli sumka g‘oyasi uy bekasi Juli Dinda paydo bo‘lgan. Moliyaviy qiyinchilikni boshidan o‘tkazayotgan va farzandlarini yolg‘iz tarbiyalayotgan ona yangi sumka chizmasini ishlab chiqadi va o‘zi tanlagan atelyeda sumkani charm matodan tiktiradi. Avvaliga portfelni internet do‘konlarda maktab o‘quvchilar uchun sota boshlaydi.

Keyinroq Juli savdoni maktab auditoriyasi bilan cheklamaslikka qaror qilib, moda blogerlariga murojaat qiladi. U yangi brendi haqida tavsifnoma va jozibali fotosuratlarni o‘z ichiga olgan xatni yozish uchun ko‘p vaqt sarfladi. Xatda u agar sumkalar ma’qul kelsa, rasm o‘rniga haqiqiy portfellarni yuborishini va’da qiladi. Va uning orzusi amalga oshadi: New York Fashion Week — 2011 arafasida Elle UK muharrirlari Juliga javob beradi va sumkalarning bir nechta namunalarini taqdim etishni so‘rab, murojaat qiladi. Moda haftaligida ko‘rgazmaga qo‘yilgan sumkalar ko‘plab moda ixlosmandlariga yoqadi va Juli mashhur brend bilan shartnoma tuzadi. Hozirda Cambridge satchel sumkasi 10 ga yaqin davlatlarda sotuvga qo‘yilgan.
Izoh (0)