Reuters xabariga ko‘ra, Tunis prezidentligiga nomzod bo‘lgan besh nafar vakil qamoq jazosiga hukm qilingan. Endi ular mamlakatda oktyabrga belgilangan prezidentlik saylovlarida qatnasha olmaydi. Shu kuni amaldagi prezident Kays Said davlat rahbari lavozimiga nomzod sifatida rasman ro‘yxatga olindi.
Poytaxt sudlaridan biri tunislik taniqli siyosatchi Abdullatif Makki, faol Nizar Chaari, sudya Murod Masudiy va prezidentlikka yana bir ehtimoliy nomzod Adel Duga hukm chiqardi. Ularning barchasi saylovchilarga pora berganlikda ayblanib, sakkiz oylik qamoq jazosiga hukm qilingan. Shuningdek, advokat va ashaddiy muxolifatchi Abir Mussiy ikki yillik qamoq jazosiga hukm qilindi. U saylov komissiyasini haqorat qilishda ayblangan.
Muxolifat partiyalari va inson huquqlari guruhlari hukumat shu tariqa Tunisning amaldagi prezidenti Kays Saidning barcha jiddiy raqiblarini yo‘q qilayotganini da’vo qilmoqda. O‘tgan oy sud prezidentlikka yana bir potensial nomzod, amaldagi prezidentning ashaddiy tanqidchisi Lutfiy Miriyiyni saylovchilarga pora berganlikda ayblab, sakkiz oylik qamoq jazosiga hukm qildi. Shuningdek, sud unga prezidentlik saylovlarida ishtirok etishni taqiqlagan.
Izoh (0)