AQSH rahbariyati Isroil Eronning raketa hujumiga javoban AQSHda prezidentlik saylovlari bo‘ladigan 5-noyabr kunigacha zarba yo‘llaydi, deb hisoblamoqda. Bu haqida CNN manbalarga tayanib xabar berdi.
Telekompaniya suhbatdoshlarining aniqlik kiritishicha, Isroil hukumati Eronga qarshi javob zarbasi vaqtini faol muhokama qilgan bo‘lsa-da, qaror qabul qilish jarayoni AQSHdagi prezidentlik saylovlari bilan bevosita bog‘liq emas.
Shuningdek, Isroil bosh vaziri Binyamin Netanyaxu mamlakatning Eronga javob zarbasiga AQSH salbiy munosabat bildirishi mumkinligidan juda xavotirda ekani ham CNN suhbatdoshi tomonidan ma’lum qilingan.
Avvalroq CNN telekanalining boshqa manbasi Isroil Eronga javob qaytarish rejalarini yakunlaganini aytgandi. Shuningdek, mazkur manba Isroil rahbariyati aʼzolari, jumladan, Netanyaxu Qo‘shma Shtatlarni Isroilning Eronga qarshi javob zarbasi neft va yadroviy obyektlarga qarshi emas, balki harbiy nishonlar bilan cheklanishiga ishontirganini bildirgandi.
Kecha 15-oktyabr kuni Isroil Mudofaa vaziri Yoav Galant Eronga javob zarbasi tez orada boshlanishini ma’lum qilgandi.
“Bu aniq va halokatli javob bo‘ladi”, degan Isroil Mudofaa vaziri.
Avvalroq Kan davlat teleradiokompaniyasi Isroil bosh vaziri Binyamin Netanyaxu Galant va boshqa baʼzi muhim vazirlar bilan Eronga hujum parametrlari va vaqti bo‘yicha kelishib olgani, endi esa Isroil Vazirlar Mahkamasining yakuniy maʼqullashi kutilayotgani haqida xabar bergan edi.
Izoh (0)