АҚШ раҳбарияти Исроил Эроннинг ракета ҳужумига жавобан АҚШда президентлик сайловлари бўладиган 5 ноябрь кунигача зарба йўллайди, деб ҳисобламоқда. Бу ҳақида CNN манбаларга таяниб хабар берди.
Телекомпания суҳбатдошларининг аниқлик киритишича, Исроил ҳукумати Эронга қарши жавоб зарбаси вақтини фаол муҳокама қилган бўлса-да, қарор қабул қилиш жараёни АҚШдаги президентлик сайловлари билан бевосита боғлиқ эмас.
Шунингдек, Исроил бош вазири Биньямин Нетаньяху мамлакатнинг Эронга жавоб зарбасига АҚШ салбий муносабат билдириши мумкинлигидан жуда хавотирда экани ҳам CNN суҳбатдоши томонидан маълум қилинган.
Аввалроқ CNN телеканалининг бошқа манбаси Исроил Эронга жавоб қайтариш режаларини якунлаганини айтганди. Шунингдек, мазкур манба Исроил раҳбарияти аъзолари, жумладан, Нетаньяху Қўшма Штатларни Исроилнинг Эронга қарши жавоб зарбаси нефть ва ядровий объектларга қарши эмас, балки ҳарбий нишонлар билан чекланишига ишонтирганини билдирганди.
Кеча 15 октябрь куни Исроил Мудофаа вазири Йоав Галант Эронга жавоб зарбаси тез орада бошланишини маълум қилганди.
“Бу аниқ ва ҳалокатли жавоб бўлади”, деган Исроил Мудофаа вазири.
Аввалроқ Кан давлат телерадиокомпанияси Исроил бош вазири Биньямин Нетаньяху Галант ва бошқа баъзи муҳим вазирлар билан Эронга ҳужум параметрлари ва вақти бўйича келишиб олгани, энди эса Исроил Вазирлар Маҳкамасининг якуний маъқуллаши кутилаётгани ҳақида хабар берган эди.
Изоҳ (0)