Isroil harbiy-havo kuchlari samolyotlari birinchi marta Livan shimolidagi, asosan nasroniylar yashaydigan Zgharta hududiga zarba berdi, deb xabar beradi Livan milliy axborot agentligi NNA.
“Isroil agressiyasi boshlanganidan beri birinchi marta harbiy samolyotlar Zgharta tumani, Aytu shahridagi binoga hujum qildi”, deb yozadi agentlik.
Avvalroq insonparvarlik yordami olib ketayotgan yuk mashinalari karvoni Livan sharqida Isroil havo hujumiga uchragani xabar qilingandi. Mamlakat janubidagi bir qancha aholi punktlari ham bombardimon qilindi.
1-oktyabrdan beri Isroil Livan janubida “Hizbulloh” kuchlariga qarshi quruqlikdagi operatsiyani olib bormoqda va qo‘shni davlatni havodan bombardimon qilishda davom etmoqda. Bu yerda allaqachon 2,3 mingdan ortiq odam halok bo‘lgan va milliondan ortiq odam qochqinlarga aylangan.
Yo‘qotishlarga qaramay, “Hizbulloh” quruqlikdagi janglarni olib bormoqda va Isroil hududiga raketa hujumlarini to‘xtatmayapti.
Isroil—Livan chegarasidagi vaziyat 2023-yil oktyabr oyida G‘azo sektorida Isroil harbiy amaliyotlari boshlanganidan keyin yomonlashgan.
Izoh (0)