AQSH prezidenti Jo Bayden 9-oktyabr kuni Isroil bosh vaziri Binyamin Netanyaxu bilan telefon orqali muloqot qilishni rejalashtirmoqda.
Axios nashrining xabar berishicha, ular Isroilning Eron hujumiga javobini muhokama qiladi. Shunga o‘xshash ma’lumot Reuters tomonidan taqdim etilgan.
Bayden va Netanyaxu o‘rtasidagi kutilayotgan suhbat ikki oy ichida birinchisi bo‘ladi. Axios maʼlumotlariga ko‘ra, kechasi Netanyaxu vazirlar, harbiylar, razvedka xizmatlari rahbarlari bilan Eronga hujumlar ko‘lami hamda vaqtini aniqlash uchun bir necha soat suhbatlashgan.
Ismini oshkor etmagan isroillik rasmiyga ko‘ra, Isroilning javobi “ahamiyatli bo‘ladi” va ehtimol Erondagi harbiy nishonlarga havo hujumlari va Tehronda HAMAS yetakchisi Ismoil Haniya o‘ldirilgani kabi yashirin hujumlarni o‘z ichiga oladi. Isroil, shuningdek, Eronning neft infratuzilmasini nishonga olishni ko‘rib chiqmoqda, biroq Jo Bayden bunga qarshi.
Reuters’ga ko‘ra, Bayden qo‘ng‘iroq paytida Isroilning javobi o‘rinli yoki yo‘qligi haqida o‘z fikrlarini bildirishga umid qilmoqda. AQSH prezidenti va Isroil bosh vaziri Livan va G‘azodagi urushlarni ham muhokama qilishi kutilmoqda.
- 1-oktyabr kuni Eron Isroil tomon 180 dan ortiq ballistik raketa uchirgan edi.
- Eron rasmiylari mazkur hujumni Livanning “Hizbulloh” harakati bosh kotibi Hasan Nasrullohning o‘ldirilishiga javob deb atagan.
- Isroil rasmiylari javob zarbasi berish bilan tahdid qilgan.
- OAVga ko‘ra, ular Vashingtonning e’tirozlariga qaramay, Tehronning yadroviy inshootlariga hujum qilishni ham ko‘rib chiqmoqda.
- Kan portalining yozishicha, AQSH Eron nishonlariga hujum qilishdan voz kechishi uchun uchun Isroilga tovon puli taklif qilgan.
Izoh (0)