Isroil harbiy-siyosiy vazirlar mahkamasi oktyabr oyi boshida amalga oshirilgan raketa hujumi uchun Eronga qanday javob berishni hal qila olmadi, deya Isroil televideniyesi xabar berdi.
“Xavfsizlik masalalari bo‘yicha Vazirlar mahkamasi yig‘ilib, to‘rt soat davomida munozara olib bordi, uning davomida siyosatchilar Eronga javob hujumi masalasini ham ko‘tardi, biroq qaror qabul qilinmadi”, deyiladi xabarda.
Ta’kidlanganidek, rasmiylar Isroil bosh vaziri Binyamin Netanyaxu va mudofaa vaziri Yoav Galantga Tehronga javob choralarini ko‘rishga ruxsat berishi kerak edi. Biroq noma’lum sabablarga ko‘ra, ular bunga ruxsat bermagan.
Shu bilan birga, hukumat rahbari Eronga javob choralari bo‘yicha yakuniy qaror qabul qilinmaguncha, harbiy departament rahbarining amerikalik hamkasblari bilan Yaqin Sharqdagi vaziyatni baholash uchun AQSHga safarini muvofiqlashtirishga tayyor emasligi ta’kidlangan.
1-oktyabr kuni Eron Isroilga yirik aviazarba uyushtirgan edi. Isroil armiyasiga ko‘ra, 180 ga yaqin ballistik raketalar uchirilgan, ularning aksariyati tutib olingan. Islom inqilobi qo‘riqchilari ta’kidlaganidek, hujum “Hizbulloh” bosh kotibi Hasan Nasrulloh, HAMAS siyosiy byurosi rahbari Ismoil Haniya o‘limiga javob bo‘lgan.
Izoh (0)