“Bravo” kulgi jamoasi “Xalqlar do‘stligi” san’at saroyida sakkiz kunlik konsert dasturini o‘tkazmoqda. Havo sovuq va yomg‘irli bo‘lishiga qaramay, har kuni to‘rt mingdan ziyod tomoshabin vaqtini maroqli o‘tkazish maqsadida konsertga tashrif buyuryapti. Sababi “Bravo” guruhi ularga ajoyib konsert dasturi va xush kayfiyat va’da qilgan. “Daryo” jamoasi konsertdan maxsus reportaj tayyorladi.
— Konsert ajoyib o‘tdi, mazza qilib ishlayapmiz. Birinchi kuni isitmam bor edi, ammo shunga qaramay sahnaga chiqdim — qiyinchilik faqat shu bo‘ldi. Konsertdan uch kun avval tobim bo‘lmay qoldi, ikki kun repetitsiyada ham qatnasha olmadim, ukol olib bir amallab oyoqqa turdim. Xudoga shukr, olqishlar va tomoshabinlarning mehri bilan kasallik ham sezilmadi.
Konsertga kelganlar Instagramdan tadbir zo‘r o‘tdi, sizni ko‘rgimiz kelgandi, deb yozishyapti. Aslini olganda, jamoaning har bir a’zosining o‘z muxlisi bor, hammaga iliq fikrlar va tabriklar kelyapti, deydi Durdona Qurbonova.
Otabek Mirzaxolov konsertoldi ovozi bo‘g‘ilib qolganini hazilga burdi:
— San’atkorlarni kulgiga olib chiqardik, lekin ularga ham oson emaskan. Bir ishni qilib ko‘rmaguncha yengil deb o‘ylarkansiz-da. Konsertda jonli qo‘shiq aytadigan sahnamiz bor, vokaldan biroz saboq oldim, hayot majbur qilsa har narsa qilarkan inson (kulib).
Otabek jamoani tark etishi haqida muxlislarga ma’lum qilinganidan so‘ng “Hali Barvoga keraksiz”, “Yosh-ku, nega ketyapti”, “O‘zi 38 yosh-u, lekin 50 yoshli odamdek fikrlayapti” kabi ko‘plab izohlar kela boshladi.
— O‘zim yosh bo‘lsam-da ichim qarib qolgandir, balki (kulib). Baribir qachondir shunday bo‘lardi, tezroq bo‘lgani ham yaxshi, menimcha. “Bravo”dan butunlay ketmayman, albatta. Faqatgina konsert dasturidagi faoliyatimni to‘xtatdim, dedim. Lekin yigitlarga qanday yordam kerak bo‘lsa qo‘limdan kelgancha yordam beraman. Agar o‘zimiz eplaymiz deyishsa, bunga ham roziman. San’atning boshqa yo‘nalishlarida aynan “Bravo” yigitlari bilan ijod qilaman, deb izoh berdi qiziqchi.
Durdona Qurbonova Otabek Mirzaxolovning guruhdan ketishi unga qanday ta’sir qilayotgani haqida gapirdi.
— To‘g‘risini aytsam, ketmaydilar deb o‘ylayapman. Bunday o‘ylashimga sabab nimadaligini o‘zim ham bilmayman. Balki guruhda qolishlari mumkin, buni endi vaqt ko‘rsatadi. Otabek aka bilan nafaqat konsertda, balki kino va ko‘rsatuvlarda ham birga ishlaymiz. Shu sababli guruhning bir a’zosi bilan xayrlashish tuyg‘usi menga hali unchalik sezilmadi.
Umid Umarov konsert kutganidan emas, undan-da a’lo o‘tayotganidan xursand bo‘ldi.
— Mana bugun to‘rtinchi kun bo‘lsa, men kutgandan ham yaxshi natija bo‘lyapti. Lekin hayajon bor, bu ham mas’uliyat, ham majburiyat yuklaydi. Avvallari 10-12 kunlab konsert, qo‘yardik, kuchimiz yetardi. Sezgan bo‘lsangiz charchayapmiz, lekin buni tomoshabinlarga sezdirmaslikka harakat qildik. Yoshimiz o‘tib qoldi (kulib). O‘n yil avvalgi Umid bilan Ahmadni hozirgisidan ancha farqi bor.
Bu yilgi konsertda Xoliqjon vayner nega ishtirok etmayotgani sababi ham guruh a’zolari tomonidan aytib o‘tildi.
— Har yili ham ishtirok etavermaydi-ku. Konsertoldi rejalar bo‘ladi, dastur ishlab chiqamiz va shunga qarab jamoa yig‘iladi. Hammaning omadini bersin.
Durdona boshqa kulgi jamoasidan takliflar bo‘lsa, qanday yo‘l tutishini aytdi.
— Oxirigacha “Barvo” jamoasi bilan qolaman, albatta. Rostini aytsam, qiziqchilar guruhida boshqa chiqmayman deb, o‘zimga o‘zim so‘z bergandim. Jonli sahnani juda yaxshi ko‘raman, orada 2-3 yil qatnashmaganimda rosa sog‘indim. Mayli, gapirgan gapimdan qaytsam ham sahnaga chiqqim keldi va “Bravo” bilan ijodni davom ettiryapman. Sahnada turganimda to‘rt mingta insonning eshitiladigan kulgisi va emotsiyasini hech nimaga alishib bo‘lmaydi.
Aktrisa Sayyora Qoziyeva yaqin dugonasi Umida Mirhamidovani qo‘llab-quvvatlash uchun konsertga kelib, sahna ko‘rinishlari oldidan dugonasi bilan birga bo‘ldi.
— Konsertdan yaxshi kayfiyat bilan ketaman, degan umiddaman. “Umida, bravo” deb qarsak chalsam kerak. Bugun yaqin insonim, sirdoshim, har qanday vaziyatda suyana oladigan odamimni qo‘llab-quvvatlashga keldim, deydi xonanda.
Umida Mirhamidova shamollab qolganiga qaramay, konsertda o‘z chiqishlari bilan muxlislarning kayfiyatini ko‘taryapti.
— “Barvo” aslida “QVZ” yigitlaridan tashkil topgan “Million” jamoasining ikkiga bo‘lingan qismi. U yerda ham, bu yerda ham kuchlilar bor. Fikrimcha, ikki jamoa qo‘shilsa, kuchli guruh tashkil topardi. Lekin hozir ham yomon emas, o‘zida iste’dod bor odam har yerda bilinadi.
Konsertning yarmi o‘tgan bo‘lsa-da har kuni hayajondamiz, professional sahnada baribir hayajon bo‘lishi tabiiy. Kelin salomni ko‘p aytaman, kerak bo‘lsa joyida yangi so‘zlar keladi. Lekin bunday sahnaning mas’uliyati bor, har zamonda borib so‘zlarimni qaytarib olyapman. Xudo xohlasa, bugungisi ham yaxshi chiqishiga umid qilyapman, deydi Umida Mirhamidova.
Konsertda jami o‘nta sahna ko‘rinishi bo‘ldi, xalq dardi kulgi orqali olib chiqilgan sahna ko‘rinishlari to‘xtovsiz olqishlarga sabab bo‘ldi.
Konsertni to‘liq holda “Daryo” YouTube kanalida tomosha qiling.
Izoh (0)