“Bravo” kulgi jamoasi aʼzosi Otabek Mirzaxolov YouTubeʼdagi “Daryo Lifestayle” kanaliga bergan intervyusida bu konsertdagi so‘nggi ishtiroki ekanligini maʼlum qildi.
— Bu dunyoda har narsaning o‘z vaqt soati bor. Bir aqlli inson: “Agar ishing eng sevimli hobbiying bo‘lsa, demak, sen baxtlisan” degan ekan. “Quvnoqlar va zukkolar”ga kirib kelganimga 18 yil bo‘libdi. O‘shanda endigina 20 yoshni qarshilagan, talaba yigit edim. Ulg‘aydim, oilali bo‘ldim, olti farzandning otasiga aylandim. Ammo hayotim faqat sahna bilan bog‘lanib qolishini istamayman. Sir emas, bitta konsert uchun juda ko‘p energiya va vaqt sarflaymiz. Ammo kun kelib, afsuslanib qolmasligim uchun sahnadan tashqarida qiladigan ishlarim ham bor. Bu qarorni qachondir qabul qilishim kerak edi.
Onam “Nega bunday deyapsan, sevimli ishing-ku”, dedi. To‘g‘ri, sahnani yaxshi ko‘raman, ammo baribir shunday qilishim kerak. Bu qarorim birdan paydo o‘lgani yo‘q, bu haqda juda uzoq o‘yladim. Har holda 18 yil oz muddat emas, “Bravo”ga ishonadigan muxlislarni orttirish uchun ko‘p harakat qildik.
“Bravo”dan ketganimdan keyin asosiy eʼtiborimni kinofilmlar yaratish va televideniyedagi faoliyatimga qaratmoqchiman, deydi Otabek Mirzaxolov.
“Siz ketgandan keyin jamoa zaiflanib qolmasmikan?” degan savolga komik aktyor quyidagicha javob berdi.
— Yoshlar qabul qilinyapti, ular ketganlarning o‘rinni to‘ldirishiga ishonaman. Bundan tashqari, jamoadan ketganimdan keyin ham sahnadan tashqarida qandaydir yordam kerak bo‘lsa tayyorman. Agar jamoada bir-ikki kishi ijod qilib, qolganlar shunchaki rol ijro etadigan bo‘lsa, bitta aʼzoning ketishi ham yaqqol sezilib qoladi. Shukrki, bizda hamma ijodkor, kimdir ssenariy yozib bermaydi.
2007-yildan beri katta sahnaga chiqayotgan bo‘lsam, unda charchoqni emas, zavqni his qilaman. U qanchalik maroqli bo‘lmasin, o‘z vaqtida ketishni ham bilish kerak. “Davring kelganida davringni sur, davring tugamasidan davradan sur”, deyishganidek obro‘yim borida sahnadan ketmoqchiman.
O‘lgandan keyin qabr tepasiga borib “Men seni yaxshi ko‘rardim, sen keraksan. Yonimda bo‘lishingni istayapman” degandan ko‘ra shu gaplarni o‘sha inson tirikligida aytish kerak. Aytmoqchi bo‘lganim: ishdan tashqari hayotligimizda eʼtibor qaratishimiz kerak bo‘lgan juda ko‘p yaqinlarimiz bor. Hayotimda tub burilish yasashim kerak bo‘lgan damga keldim. “Sahnadan ketsam, keyingi hayotim nima bo‘ladi?”, degan xavotir umuman yo‘q. Endi bor eʼtiborimni oilamga qaratmoqchiman, deydi Otabek Mirzaxolov.
Videoni to‘liq holda tomosha qilishingizni tavsiya qilamiz.
Izoh (0)