Ko‘plab xit qo‘shiqlar muallifi, xonanda Jaloliddin Ahmadaliyev 29-maydan 1-iyunga qadar “Xalqlar do‘stligi” san’at saroyida “Biz ham bir yashasak maylimi?” deb nomlangan navbatdagi konsert dasturini taqdim etmoqda. “Daryo” muxbirlari konsertga tashrif buyurib, video va fotoreportaj tayyorladi.

Jaloliddin Ahmadaliyev konsert dasturini to‘liq jonli ijroda muxlislariga taqdim etadi. Xonanda bu yilgi konsert dasturi davomida ijodidagi xit darajasiga chiqqan taronalarni va shuningdek yangi ijod namunalarini kuyladi.

Konsert dasturi xonandaning “19 yil” taronasi bilan boshlandi. Dasturga “Bravo” kulgi jamoasi a’zosi Umid Umarov, Jamshid Normatov hamda “Maksimum” kulgi jamoasi vakili Oybek Teshaboyev boshlovchilik qildi. Jaloliddin Ahmadaliyev konsert dasturi davomida muxlislari bilan muloqot qilib, taronalarini ular bilan birga ijro etdi.

“Konsert boshlanishidan oldin hech narsani o‘ylamayapman. Hayajon bor, tavakkal qilgan insonmiz. Repertuar tuzishda muxlislarni zeriktirib qo‘ymaslikka e’tibor qaratdim. Mavzu jihatdan doimiy mavzularga murojaat qildim. Jonli ijroda kuylashda hech qanday qiyinchilikka duch kelmaganman, hammasi joyida”, — deydi Jaloliddin Ahmadaliyev.

“Jaloliddin Ahmadaliyevning ijodiga bitta mening emas, boshqalarning ham munosabati ijobiy. Yaxshi inson, yaxshi ijod qilyapti. Ijodi xalqqa manzur bo‘lyapti, shuning uchun “Xalqlar do‘stligi” san’at saroyida to‘rt kun jonli ijroda konsert beryapti. O‘tgan yili ham uning konsert dasturiga boshlovchilik qilgandim, bu yil ham o‘zi taklif bilan chiqdi, eshitib xursand bo‘ldim. Jaloliddinning men bilgan yaxshi tomoni — kamtarligi. Qo‘shiqlarida ma’no bor, eshitib maza qilyapman. Hurmat qilaman”, — deydi “Bravo” kulgi jamoasi a’zosi Umid Umarov.

“Jaloliddin Ahmadaliyev yil xitlari, yil xonandasi, yil ijrochisi e’tirofiga sazovor bo‘ldi. Buning tagida katta mehnat yotibdi. Unga “Xalqlar do‘stligi” san’at saroyining ijarasiga 50 foiz chegirma qilib berishdi, bunga sabab esa xonandaning jonli ijroda kuylashi. Jaloliddinning konsertiga taklif etilganimdan xursandman, uning ijodiga omad tilayman”, — deydi qiziqchi Jamshid Normatov.

Xonandaning bu konserti ham boshqa dasturlardan farqli ravishda rejissor, grimyor, raqqosa va bek-vokal ijrochilarisiz o‘tdi. Odatda xonandalar konsertlarida raqqosalar qo‘shiqqa mos raqslarga tushishini istashadi. Albatta, bu konsertning tomoshabopligini oshiradi. Ammo  yosh xonanda Jaloliddin Ahmadaliyevning konserti bularsiz ham fayzli bo‘ldi.

Konsertdan batafsil reportajni quyida tomosha qilishingiz mumkin.