“Браво” кулги жамоаси “Халқлар дўстлиги” санъат саройида саккиз кунлик концерт дастурини ўтказмоқда. Ҳаво совуқ ва ёмғирли бўлишига қарамай, ҳар куни тўрт мингдан зиёд томошабин вақтини мароқли ўтказиш мақсадида концертга ташриф буюряпти. Сабаби “Браво” гуруҳи уларга ажойиб концерт дастури ва хуш кайфият ваъда қилган. “Дарё” жамоаси концертдан махсус репортаж тайёрлади.
— Концерт ажойиб ўтди, мазза қилиб ишлаяпмиз. Биринчи куни иситмам бор эди, аммо шунга қарамай саҳнага чиқдим — қийинчилик фақат шу бўлди. Концертдан уч кун аввал тобим бўлмай қолди, икки кун репетицияда ҳам қатнаша олмадим, укол олиб бир амаллаб оёққа турдим. Худога шукр, олқишлар ва томошабинларнинг меҳри билан касаллик ҳам сезилмади.
Концертга келганлар Instagramдан тадбир зўр ўтди, сизни кўргимиз келганди, деб ёзишяпти. Аслини олганда, жамоанинг ҳар бир аъзосининг ўз мухлиси бор, ҳаммага илиқ фикрлар ва табриклар келяпти, дейди Дурдона Қурбонова.
Отабек Мирзахолов концертолди овози бўғилиб қолганини ҳазилга бурди:
— Санъаткорларни кулгига олиб чиқардик, лекин уларга ҳам осон эмаскан. Бир ишни қилиб кўрмагунча енгил деб ўйларкансиз-да. Концертда жонли қўшиқ айтадиган саҳнамиз бор, вокалдан бир оз сабоқ олдим, ҳаёт мажбур қилса ҳар нарса қиларкан инсон (кулиб).
Отабек жамоани тарк этиши ҳақида мухлисларга маълум қилинганидан сўнг “Ҳали Барвога керакциз”, “Ёш-ку, нега кетяпти”, “Ўзи 38 ёш-у, лекин 50 ёшли одамдек фикрлаяпти” каби кўплаб изоҳлар кела бошлади.
— Ўзим ёш бўлсам-да ичим қариб қолгандир, балки (кулиб). Барибир қачондир шундай бўларди, тезроқ бўлгани ҳам яхши, менимча. “Браво”дан бутунлай кетмайман, албатта. Фақатгина концерт дастуридаги фаолиятимни тўхтатдим, дедим. Лекин йигитларга қандай ёрдам керак бўлса қўлимдан келганча ёрдам бераман. Агар ўзимиз эплаймиз дейишса, бунга ҳам розиман. Санъатнинг бошқа йўналишларида айнан “Браво” йигитлари билан ижод қиламан, деб изоҳ берди қизиқчи.
Дурдона Қурбонова Отабек Мирзахоловнинг гуруҳдан кетиши унга қандай таъсир қилаётгани ҳақида гапирди.
— Тўғрисини айтсам, кетмайдилар деб ўйлаяпман. Бундай ўйлашимга сабаб нимадалигини ўзим ҳам билмайман. Балки гуруҳда қолишлари мумкин, буни энди вақт кўрсатади. Отабек ака билан нафақат концертда, балки кино ва кўрсатувларда ҳам бирга ишлаймиз. Шу сабабли гуруҳнинг бир аъзоси билан хайрлашиш туйғуси менга ҳали унчалик сезилмади.
Умид Умаров концерт кутганидан эмас, ундан-да аъло ўтаётганидан хурсанд бўлди.
— Мана бугун тўртинчи кун бўлса, мен кутгандан ҳам яхши натижа бўляпти. Лекин ҳаяжон бор, бу ҳам масъулият, ҳам мажбурият юклайди. Авваллари 10-12 кунлаб концерт, қўярдик, кучимиз етарди. Сезган бўлсангиз чарчаяпмиз, лекин буни томошабинларга сездирмасликка ҳаракат қилдик. Ёшимиз ўтиб қолди (кулиб). Ўн йил аввалги Умид билан Аҳмадни ҳозиргисидан анча фарқи бор.
Бу йилги концертда Холиқжон вайнер нега иштирок этмаётгани сабаби ҳам гуруҳ аъзолари томонидан айтиб ўтилди.
— Ҳар йили ҳам иштирок этавермайди-ку. Концертолди режалар бўлади, дастур ишлаб чиқамиз ва шунга қараб жамоа йиғилади. Ҳамманинг омадини берсин.
Дурдона бошқа кулги жамоасидан таклифлар бўлса, қандай йўл тутишини айтди.
— Охиригача “Барво” жамоаси билан қоламан, албатта. Ростини айтсам, қизиқчилар гуруҳида бошқа чиқмайман деб, ўзимга ўзим сўз бергандим. Жонли саҳнани жуда яхши кўраман, орада 2-3 йил қатнашмаганимда роса соғиндим. Майли, гапирган гапимдан қайтсам ҳам саҳнага чиққим келди ва “Браво” билан ижодни давом эттиряпман. Саҳнада турганимда тўрт мингта инсоннинг эшитиладиган кулгиси ва эмоциясини ҳеч нимага алишиб бўлмайди.
Актриса Сайёра Қозиева яқин дугонаси Умида Мирҳамидовани қўллаб-қувватлаш учун концертга келиб, саҳна кўринишлари олдидан дугонаси билан бирга бўлди.
— Концертдан яхши кайфият билан кетаман, деган умиддаман. “Умида, браво” деб қарсак чалсам керак. Бугун яқин инсоним, сирдошим, ҳар қандай вазиятда суяна оладиган одамимни қўллаб-қувватлашга келдим, дейди хонанда.
Умида Мирҳамидова шамоллаб қолганига қарамай, концертда ўз чиқишлари билан мухлисларнинг кайфиятини кўтаряпти.
— “Барво” аслида “ҚВЗ” йигитларидан ташкил топган “Миллион” жамоасининг иккига бўлинган қисми. У ерда ҳам, бу ерда ҳам кучлилар бор. Фикримча, икки жамоа қўшилса, кучли гуруҳ ташкил топарди. Лекин ҳозир ҳам ёмон эмас, ўзида истеъдод бор одам ҳар ерда билинади.
Концертнинг ярми ўтган бўлса-да ҳар куни ҳаяжондамиз, профессионал саҳнада барибир ҳаяжон бўлиши табиий. Келин саломни кўп айтаман, керак бўлса жойида янги сўзлар келади. Лекин бундай саҳнанинг масъулияти бор, ҳар замонда бориб сўзларимни қайтариб оляпман. Худо хоҳласа, бугунгиси ҳам яхши чиқишига умид қиляпман, дейди Умида Мирҳамидова.
Концертда жами ўнта саҳна кўриниши бўлди, халқ дарди кулги орқали олиб чиқилган саҳна кўринишлари тўхтовсиз олқишларга сабаб бўлди.
Концертни тўлиқ ҳолда “Дарё” YouTube каналида томоша қилинг.
Изоҳ (0)