Qiziqchi Jamshid Normatov YouTube’dagi “Daryo Lifestayle” kanaliga bergan intervyusida ota-onasidan ketma-ket ayrilgani, birinchi turmush o‘rtog‘ining vafoti va “Bravo” bilan bo‘lgan kelishuv nima uchun uzoq davom etmagani haqidagi savollarga javob berdi.
— Ota-onam mashhurlikka erishishimni, mukofotlar qo‘lga kiritishimni uzoq yil kutishdi. 2019-yil konsert berganimda ham onam ishonqiramay, orqa qatorda o‘tirgandi. “Sen bir kitob o‘qimagan bola bo‘lsang, qanday qilib konsert berasan, odamlar ustingdan kulishmasin”, degandi. Afsuski, ota-ona omonat ekan, g‘aflatda qolib ulardan ayrilib qolarkanmiz. Karantin sabab uzoq vaqt ota-onamni ko‘rgani borolmay qoldim. Bir kuni otam qo‘ng‘iroq qilib “O‘g‘lim seni ko‘rgim kelyapti-da”, dedi. U paytlari pandemiya nazorati kuchaygan, shahardan chiqishning o‘zi amrimahol edi. “Bo‘ldi boraman, ota” desam “Yo‘q, kasallik rosa ko‘payibdi, ehtiyotingni qilib uyda o‘tir” dedi. O‘sha kuni bormaganimdan va otamning so‘nggi so‘zlarini eshitolmaganimdan afsuslanaman. Chunki uch kundan keyin otamning joni uzilgani haqida xabar berishdi. Toshkentdan Beshariqqa qanday yetib borganimni bilmay qoldim.
Keyin bilsam, 64 yoshga kirgan otam meni kutib-kutib vafot etgan ekan. O‘zbekistonda bo‘la turib o‘sha payt yonida bo‘lmaganim uchun o‘zimni ko‘p koyidim. Mayli onam hayot-ku, endi unga yetarlicha eʼtibor beraman deb niyat qilgandim. 23-may kuni onam Telegram’dan ona va bola suhbati haqidagi taʼsirli video yubordi. Ovozli xabar jo‘natib, hol-ahvol so‘radim, ammo tushgacha javob kelmadi. Keyin akam qo‘ng‘iroq qilib “Tezda yetib kel, onamdan ham ayrildik”, dedi. Jonim bo‘g‘zimga keldi, “Nima qilyapsizlar, nega 40 kunda ketma-ket ham otamdan, ham onamdan ayrildik”, dedim. O‘zi oilada ikkitagina o‘g‘ilmiz. Ish, xizmat, ro‘zg‘or deb ota-onamning yonida bo‘lmaganimdan ko‘p afsuslanaman, deydi Jamshid Normatov.
Jamshid Normatov bir muddat “Bravo” kulgi jamoasiga qabul qilinishi va unda uzoq faoliyat yuritolmaganining sabablari haqida gapirdi
— “Bravo” Million” jamoasidan alohida ijod qilishni boshlaganidan keyin Otabek Mirzaxolov “Aka, konsertimizda chiqsangiz-chi, sizbop sahna ko‘rinishi bor”, dedi. Shevalar bilan bog‘liq sahna ko‘rinishini yozib borsam, hamma miriqib kuldi. Chiqishimiz muxlislarga ham manzur bo‘ldi. Jamoada qolib ijod qilishim mumkin edi, ammo men u yerda o‘zimni topolmadim.
Ilgari kichik davralarda qiziqchilik qilardim. Ammo konsert berish haqida o‘ylamasdim. Keyin bir tanish akamiz “Kichik davralarda yuraverasizmi, qachon konsert berasiz?” deb qoldi. Konsert berish uchun homiy bo‘lishi kerakligi haqida aytganimda, “Yordam beramiz”, deyishdi. O‘sha insonlarning turtkisi sabab 18 yil deganda katta sahna “Turkiston” sanʼat saroyida konsert berdim, deydi Jamshid Normatov.
Qiziqchi birinchi turmush o‘rtog‘i vafot etgani, uning so‘nggi daqiqagacha davolatishga harakat qilgani haqida gapirdi.
— Bu haqda hech bir intervyuda gapirmaganman. Birinchi ayolim nihoyatda yaxshi inson edi. Ammo uylanganimdan keyin jigari og‘riganligini bilib qoldim. Turmushimiz davomida farzandli bo‘lmadik, ammo so‘nggi nafasigacha uni davolatishga harakat qildim. U eng qiyin vaziyatlarimda yonimda bo‘ldi, ijarama-ijara ko‘chib yurardik. Afsuski, umri qisqa ekan, olamdan o‘tdi. Ikkinchi ayolim bilan tanishdim, to‘y kuni belgilangandan keyin ancha vaqtgacha o‘tmishim haqida aytmadim. Bilib qolgandan keyin “Nega gapirmadingiz?” deb ranjigandek bo‘ldi. Hozirgi ayolim bilan ikki o‘g‘il va bir qizim bor. Ko‘z tegmasin, hozir hayotimiz ancha yaxshi, bugungi turmush avvalgi qiyinchiliklarning mukofoti deyman, deydi Jamshid Normatov.
Videoni to‘liq holda tomosha qilishingizni tavsiya qilamiz.
Izoh (0)