“Yigit kishiga yetmish hunar ham oz”, deyishadi. O‘zbekistonlik san’atkorlar orasida ham o‘zini turli sohalarda sinab ko‘rayotgan hamda mehnati evaziga mo‘may daromad topayotganlar talaygina. Quyida aksariyat mashhurlarning ko‘pchilikka ma’lum bo‘lgan faoliyat turlari haqida so‘z boradi.
“Bravo” kulgi jamoasi a’zosi Umid Umarov dehqonchilik bilan shug‘ullanadi
— Dadam rahmatli o‘qituvchi bo‘lgan bo‘lsa ham dehqonchilik va chorvachilikka qiziqardi. Biror marta davlatdan yoki zamondan noliganini eshitmaganman. Ishdan keyin sholi ekib, bizni ham dehqonchilikka qiziqtirgan. Avvaldan xonadonimizda bir necha bosh qoramol bo‘lgan. Shu bois moddiy jihatdan ham qiynalmaganmiz. Dasturxonimiz hamisha to‘kis bo‘lgan.Dadamning ishini davom ettirib, Farg‘ona viloyatidagi Dang‘ara tumanida dehqonchilik bilan shug‘ullanaman. 60 sotix yer maydonim, 40 sotix issiqxonam bor. Har mavsumda turli ekinlarni ekamiz. Bug‘doy, mosh, makkajo‘xori, handalak, qovun, tarvuz, loviya, kartoshka sarimsoqpiyoz, xullas ekinlarimizning turi ko‘p. Issixonaga esa asosan pomidor, bodring va bulg‘or qalampiri ekiladi. Bog‘imizdan esa sara uzum, shaftoli va bodom mevalari xalqqa yetkaziladi.
Dehqonchilikdan topadigan yillik daromadim yomon emas. Urug‘, o‘g‘it, suv, yer ijarasi, ishchi xarajati va texnikalarga sarflangan puldan keyin kamida 120 million daromad topaman. To‘g‘ri, ba’zi yillari zarar ko‘rgan paytlarim ham bo‘lgan. Chunki har sohada bo‘lganidek, dehqonchilik va bog‘dorchilikning ham o‘ziga yarasha sirlari bor, — deydi “Bravo” kulgi jamoasi a’zosi Umid Umarov.
Abdujalil Qo‘qonovning 40 sotixli bog‘i bor
— Bog‘dorchilik bilan 20 yildan buyon shug‘ullanaman. Uyimiz 45 sotix, shundan 40 sotixini katta bog‘ tashkil qiladi. Uyimizga asosan uzun ekkanmiz va uni mahalladosh ukalar yordamida parvarishlaymiz. Shu kungacha 2 gektar yer maydonida tashkil etilgan bog‘ga ham egalik qilardim. Katta bog‘imizda uzum, shaftoli, gilos va limon mevalarini o‘stiramiz. Bu yil yana bir gektar yer maydoniga shartnoma imzoladik. U yerda ham uzum yetishtirish niyatimiz bor. Dehqonchilik va bog‘dorchilikda daromad katta. Faqat e’tiborli bo‘lish va mehnatdan qochmaslik kerak. Bog‘da faqat o‘zim ishlayman desam xato bo‘ladi. Mahalladosh bog‘bonlarni kunbay asosida ishga olamiz, — deydi xonanda Abdujalil Qo‘qonov.
Valijon Shamsiyev ham bog‘bon
— Dehqonchilik bilan shug‘ullanayotganimga ancha yil bo‘lgan. Ilgari 60 gektar yer maydonim bor edi, shundan 7 gektariga bog‘ tashkil qilgandik. Ammo bu sohaning ham qiyinchiligi bor, shu bois uni topshirvorishimizga to‘g‘ri keldi. Hozir faqatgina Oltiariqda 40 sotixlik bog‘im bor. U yerda asosan o‘rik va shaftoli yetishtiriladi. Toshkentdagi uyim atrofiga esa uzum va shaftoli ekkanmiz. Uyim atrofidagi bog‘ga o‘zim qarayman, katta bog‘ning esa o‘z bog‘bonlari bor, — deydi qiziqchi Valijon Shamsiyev.
Otabek Muhammadzohid: “Bog‘imdan faqat o‘z ehtiyojim uchun foydalanaman”
— Ochig‘ini aytsam, dehqonchilik va bog‘dorchilikka qiziqmayman. Ammo shahardan tashqarida bog‘ tashkil qilganmiz. Chunki ijodkor ahli hamisha sokin, bahavo joyga borib, ijod qilishni istaydi. Shu maqsadda shahardan chekkaroqda yer olib, 5-6 tupdan turli mevalar va bodom ko‘chatlarini ektirganman. Yoz kunlari u yerga borib, hordiq chiqaramiz. Tabiat qo‘ynida yaratilgan ijod mahsuli ham go‘zal bo‘ladi. Misol uchun “Mayli telba denglar” qo‘shig‘i ham aynan o‘sha bog‘da yaratilgan. Daraxtlarga bog‘bon yigit qaraydi, u yerdan katta daromad olmaymiz. Ammo yozda mazali mevalar dasturxonimizdan arimaydi, — deydi xonanda Otabek Muhammadzohid.
Abdurashid Yo‘ldoshev: “Bolalaligimizdan bu ishlarni erkak kishi bilishi kerak, deb ulg‘ayganmiz”
— Haqiqatan ham oilamizning katta bog‘i bor, ammo bu ish bilan asosan Abduvohid akam shug‘ullanadi. Otam ham chorvachilik, dehqonchilik va bog‘bonchilikka qiziqqan. Shu bois, bolalaligimizdan bu ishlarni erkak kishi bilishi kerak, deb ulg‘ayganmiz. Bog‘imizda olma, shaftoli va g‘ilos mevalari bor. Mavsumga qarab, bozordagi talabgirligiga qarab sabzavotlar ekiladi. Bu yil asosan bodring va pomidor ekishdi. Ochig‘ini aytaman, ilgari ekinlarga onda-sonda bo‘lsa ham qo‘lim tegib turardi. Hozir ishlarim ko‘pligidan “Hay barakalladan” nariga o‘tolmay qolganman, — deydi xonanda Abdurashid Yo‘ldoshev.
Rahmonali Suropov 10 yildan buyon dehqon
— Dehqonchilik bilan 10 yildan buyon muntazam shug‘ullanaman. Har yili deyarli zarariga ishlayman. “Bo‘ldi, endi dehqonchilik qilmayman”, deyman-u, ammo qiziqish sabab bahorda yana ishni boshlab yuboraman. Bahorda 25 sotix issiqxonaga bodring ekdim. Hozir yomon bo‘lmadi, ammo bodringlar arzon paytda bozorga chiqdi. Hozir esa 1 gektar yerga pomidor ekkanman. Hozir ham O‘rtasaroydagi dalada beri kelolmayapman. Sababi pomidorga qurt tushib ketyapti. Eng kuchli dori ham bir haftaga yetmay ta’sirini yo‘qotyapti. Odamlar kimyoviy moddalarni ko‘p ishlatasizlar deb nolishadi. To‘g‘ri, ammo dehqonlarga ham oson emas. Bittagina pashsha axlatidan paydo bo‘lgan qurt avvaliga pomidor barglarini, undan keyin mevasini qurutyapti, — deydi komik aktyor Rahmonali Suropov.
Mavzuga doir:
- Shukurullo Isroilov — “morg”da, Sevara Nazarxon — “Ippodrom”da. Mashhur bo‘lishidan avval o‘zini turli sohalarda sinab ko‘rgan o‘zbekistonlik san’atkorlar (video)
- “Zarariga ishlayotgan bo‘lsa ham korxonamni yopa olmayman”. Yulduz Usmonova prezident bilan gapi bir joydan chiqqani va yangi biznes boshlayotgani haqida (video)
- Chumchuq so‘ysa ham, qassob so‘ysin. Tadbirkorlikni uddalay olmagan o‘zbek shou-biznesi vakillari
Izoh (1)
Ajoyib men yaxshigina motivatsiya oldim desam ham boʻladi