Argentinalik futbolchi Lionel Messi Marca nashri tomonidan taqdirlanadi.
Nashr futbolchining faoliyatiga hurmat tarzda maxsus mukofot topshiradi. Taqdirlash marosimi 17-oktyabr kuni Floridada joylashgan “Inter Mayami” klubi stadionida bo‘lib o‘tadi.
“Leo oilasi, jamoadoshlari, sportchilar va turli homiylar hamrohligida sovrinni Marca nashri direktori Xuan Ignasio Galyardo va “Inter Mayami” xo‘jayini Xorxe Mas qo‘lidan qabul qilib oladi.
Messi professional futbolga kirganidan buyon 46 ta titulni qo‘lga kiritgan va bu rekord hisoblanadi. Nashrimizning ushbu mukofoti esa sportdagi eng buyuk afsonalardan biriga bildirilgan hurmatdir.
Uning 2004-yilda “Barselona”ga kelishidan to “PSJ”ga o‘tishiga qadar, undan keyin “Inter Mayami”dagi faoliyati, shuningdek, Argentina terma jamoasidagi qoyilmaqom faoliyati sababli Messi juda ko‘p sovrinlarga ega chiqqan: 8 ta “Oltin to‘p”, 6 ta “Oltin butsa”, La Liganing eng yaxshi to‘purari, Argentina terma jamoasining eng yaxshi to‘purari, Jahon Chempionatlarida eng ko‘p o‘yin o‘tkazgan futbolchi... Jamoaviy sovrinlarini ham ta’riflashga til ojiz”, — deyiladi Marca nashri bayonotida.
Leo 2003-yildan 2021-yilga qadar “Barselona” sharafini himoya qilgan. 2021-yildan 2023-yilgacha esa “PSJ” safida to‘p surgan. 2023-yildan buyon AQSHning “Inter Mayami” jamoasi futbolchisi sifatida o‘ynamoqda.
Izoh (0)