Bugun, 4-aprel tongida Amerikaning Fort-Loderdeyl shahridagi “Cheyz” stadionida KONKAKAF Chempionlar Kubogi 1/4 finalining birinchi o‘yini yakunlandi. “Inter Mayami” o‘z maydonida Meksikaning “Monterrey”iga 1:2 hisobida imkoniyatni boy berdi.
Uchrashuvning 19-daqiqasida “Inter Mayami”ning argentinalik himoyachisi Tomas Aviles yarim himoyachi Julian Gresselning uzatmasi bilan hisobni ochdi. 65-daqiqada mezbonlar yarim himoyachisi David Ruiz ikkinchi sariq kartochka olib maydondan chetlatildi. Uchrashuvning 69-daqiqasida mehmonlarning argentinalik yarim himoyachisi Maksimiliano Mesa hisobni tenglashtirdi. 89-daqiqada argentinalik yana bir yarim himoyachi Xorxe Rodriges Mesaning uzatmasidan g‘alaba to‘pini kiritdi.
Eslatib o‘tamiz, “Barselona”ning 3 nafar sobiq futbolchisi Xordi Alba, Serxio Buskets va Luis Suares maydonga asosiy tarkibda tushib, butun 90 daqiqa o‘ynadi.
Klubning argentinalik hujumchisi Lionel Messi jarohati sabab ushbu uchrashuvni o‘tkazib yubordi. Argentina terma jamoasi hujumchisi jarohatdan so‘ng endi umumiy guruh mashg‘ulotlariga qaytgan.
KONKAKAF Chempionlar Kubogi chorak finalining “Inter Mayami” va “Monterrey” klublari o‘rtasidagi javob uchrashuvi 11-aprel tongida bo‘lib o‘tadi.
Izoh (0)