Argentina terma jamoasi sardori va “Inter Mayami” futbolchisi Lionel Messi Boliviya bilan o‘yinda xet-trik qayd etganidan so‘ng terma jamoadagi kelajagi haqida fikr bildirdi.
“Men terma jamoada o‘ynash muddatimni belgilamayman. Men shunchaki zavqlanishni va odamlarning e’tiborini his qilishni xohlayman, chunki bu mening so‘nggi uchrashuvlarim bo‘lishi mumkinligini bilaman. Yilni bosqichma-bosqich yaxshi yakunlashni istayman”, deya Messining so‘zlarini keltirmoqda Marca.
Boliviyaga qarshi uchrashuvda 5 ta golda (3 gol va 2 assist) ishtirok etgan futbolchi Sofascore nashri tomonidan 10 ball bilan baholandi.
Bu xet-trik Messiga to‘purarlar ro‘yxatida ikkinchi o‘rinda bo‘lgan eronlik Ali Daidan o‘zib ketish imkonini berdi. Hozirda Lionel Argentina terma jamoasi safida 189 ta o‘yinda 112 ta gol urgan.
Reyting peshqadami Portugaliya terma jamoasining 39 yoshli hujumchisi Krishtianu Ronaldu bo‘lib qolmoqda, u 216 uchrashuvda 133 ta gol urgan.
JCH—2026 saralash turnirining 10 ta o‘yinida Argentina 22 ochko jamg‘arib, turnir jadvalida peshqadamlik qilmoqda. Futbolchi Argentina terma jamoasida 2005-yildan buyon o‘ynab kelmoqda. Terma jamoa tarkibida Messi 2022-yilgi Jahon chempionatida oltin medalni qo‘lga kiritdi.
Izoh (0)