Qozog‘iston Energetika vazirligi tomonidan “2024—2030-yillarga mo‘ljallangan neft-gaz kimyo sanoatini rivojlantirish bo‘yicha “yo‘l xaritasi” ishlab chiqildi.
Xarita xomashyo bilan ta’minlashdan to yakuniy mahsulotlarni chiqarishgacha bo‘lgan bosqichlarni o‘z ichiga oladi.
“Hujjatning maqsadi neft-gaz kimyo sanoatini rivojlantirish va bu boradagi loyihalarni amalga oshirishga ko‘maklashishdan iborat”, deyiladi xabarda.
Qozog‘istonda erishilishi rejalashtirilgan maqsadlar qatorida vazirlik ishlab chiqarish hajmining 357,8 ming tonnadan (2023-yil) 1,8 million tonnagacha (2030-yil) o‘sishini qayd etgan.
Bundan tashqari, barcha yangi neft-gaz kimyo loyihalari Atirau viloyatidagi “Milliy sanoat neft-kimyo texnoparki” maxsus iqtisodiy zonasini zarur xomashyo bilan taʼminlash va infratuzilmani tayyorlashni rejalashtirmoqda.
Shuningdek, umumiy qiymati 14,7 milliard dollarlik investitsiyalarni jalb etgan holda oltita loyihani amalga oshirish, uning davomida 16 mingta vaqtinchalik hamda 3,5 mingta doimiy ish o‘rni yaratish rejalashtirilgan.
Yaqin kelajakda Energetika vazirligi tomonidan soha korxonalarini bozorlar bilan taʼminlash, jumladan, neft-kimyo mahsulotlarining ichki isteʼmolini rivojlantirish ham ko‘zda tutilgan.
Uzoq muddatda esa “ilmiy bazani, inson kapitalini takomillashtirish va me’yoriy-texnik hujjatlarni qabul qilish orqali sohani rivojlantirish uchun shart-sharoitlar yaratish” amalga oshiriladi.
Vazirlikning ta’kidlashicha, “yo‘l xaritasi” Qozog‘iston hukumati tomonidan tasdiqlangan.
Izoh (0)