O‘zbekiston transport vaziri Ilhom Mahkamov Ostona shahrida Qozog‘iston transport vaziri Marat Karabayev bilan ishchi uchrashuvi o‘tkazdi. Bu haqda vazirlik matbuot xizmati xabar berdi.
-yj3Zf85z.jpg)
Qayd etilishicha, uchrashuvda tomonlar hamkorlikning asosiy yo‘nalishlari, xalqaro transport koridorlarini rivojlantirish, temiryo‘l va avtomobil transporti, transport infratuzilmasini qurish yo‘nalishida o‘zaro hamkorlikda qo‘shma loyihalarni amalga oshirish masalalarini muhokama qildi.
Xususan, O‘zbekiston—Afg‘oniston—Pokiston temiryo‘l qurilishi loyihasini hamkorlikda amalga oshirish, Belarus—Rossiya—Qozog‘iston—O‘zbekiston—Afg‘oniston—Pokiston multimodal transport koridorini birgalikda rivojlantirish va yuk tashish hujjatlarini raqamlashtirish orqali tashuvlarni yanada tezlashtirish bilan bog‘liq jihatlar ko‘rib chiqildi.
Termiz—Mozori-Sharif—Qobul—Peshovar temiryo‘li qurilishi borasida Qozog‘iston tomoni O‘zbekiston tashabbusini qo‘llab-quvvatlashini ma’lum qildi.
“Ishonchim komilki, loyihaning amalga oshirilishi Markaziy Osiyo mamlakatlari uchun mintaqaviy kommunikatsiyalar va savdoni rivojlantirishga xizmat qiladi, chunki Janubiy Osiyo mintaqasining yirik dengiz portlariga chiqish yo‘llari ochiladi”, — degan Qozog‘iston transport vaziri Marat Karabayev.
Fuqaro aviatsiyasi transport-logistika markazining asosiy harakatlantiruvchi kuchi hisoblanadi. Kazinform’ning yozishicha, hozirda Qozog‘iston va O‘zbekiston shaharlari o‘rtasida haftasiga 37 ta reys amalga oshirilmoqda.
O‘tgan yili Toshkentda Qozog‘iston va O‘zbekiston aviatsiya ma’muriyatlari o‘rtasida muzokaralar bo‘lib o‘tgan edi.
Muzokaralar chog‘ida reyslar sonini yanada oshirish va parvozlar geografiyasini kengaytirish, Ostona—Toshkent yo‘nalishi bo‘yicha ruxsat etilgan reyslar sonini haftasiga 12 tadan 36 taga, Olmaota—Toshkent yo‘nalishi bo‘yicha haftasiga 20 tadan 36 ta reysga ko‘paytirish, boshqa yo‘nalishlarda esa haftasiga 4 tagacha reysni oshirishga kelishib oldi.
Uchrashuv yakunlariga ko‘ra, tomonlar Qozog‘iston va O‘zbekiston o‘rtasida 2024—2025-yillarda transport va logistika sohasidagi strategik hamkorlikni rivojlantirish bo‘yicha “Yo‘l xaritasi”ni imzoladi.
Izoh (0)