Қозоғистон Энергетика вазирлиги томонидан “2024—2030 йилларга мўлжалланган нефть-газ кимё саноатини ривожлантириш бўйича “йўл харитаси” ишлаб чиқилди.
Харита хом ашё билан таъминлашдан то якуний маҳсулотларни чиқаришгача бўлган босқичларни ўз ичига олади.
“Ҳужжатнинг мақсади нефть-газ кимё саноатини ривожлантириш ва бу борадаги лойиҳаларни амалга оширишга кўмаклашишдан иборат”, дейилади хабарда.
Қозоғистонда эришилиши режалаштирилган мақсадлар қаторида вазирлик ишлаб чиқариш ҳажмининг 357,8 минг тоннадан (2023 йил) 1,8 миллион тоннагача (2030 йил) ўсишини қайд этган.
Бундан ташқари, барча янги нефть-газ кимё лойиҳалари Атирау вилоятидаги “Миллий саноат нефть-кимё технопарки” махсус иқтисодий зонасини зарур хом ашё билан таъминлаш ва инфратузилмани тайёрлашни режалаштирмоқда.
Шунингдек, умумий қиймати 14,7 миллиард долларлик инвестицияларни жалб этган ҳолда олтита лойиҳани амалга ошириш, унинг давомида 16 мингта вақтинчалик ҳамда 3,5 мингта доимий иш ўрни яратиш режалаштирилган.
Яқин келажакда Энергетика вазирлиги томонидан соҳа корхоналарини бозорлар билан таъминлаш, жумладан, нефть-кимё маҳсулотларининг ички истеъмолини ривожлантириш ҳам кўзда тутилган.
Узоқ муддатда эса “илмий базани, инсон капиталини такомиллаштириш ва меъёрий-техник ҳужжатларни қабул қилиш орқали соҳани ривожлантириш учун шарт-шароитлар яратиш” амалга оширилади.
Вазирликнинг таъкидлашича, “йўл харитаси” Қозоғистон ҳукумати томонидан тасдиқланган.
Изоҳ (0)