O‘zbekiston energetika vaziri Jo‘rabek Mirzamahmudov bir guruh jurnalist va blogerlar bilan uchrashib, energetika sohasidagi muammolarni muhokama qildi.
Uchrashuvda bloger Xushnud Xudoyberdiyev vazirga “O‘zbekiston barcha gaz va neftga nisbatan eksklyuziv huquqni Rossiyaga qarashli kompaniyaga 35 yilga berdimi yoki yo‘qmi?” deya savol berdi.
Vazirning ta’kidlashicha, bu yolg‘on, mutlaqo asossiz va noto‘g‘ri talqin qilingan ma’lumot. Barcha eksplutatsiyadagi konlarning aksariyati “O‘zbekneftgaz”ga tegishli. 35 yillik shartnoma to‘g‘risidagi axborotlar faqatgina “Mustaqillikning 25 yilligi” nomli konini o‘zlashtirish va ishlatishga tegishli.
“Surxondaryo viloyatining Boysun tumani hududida, agar O‘zbekistonda hozir 250 dan ortiq neft va gaz konlari mavjud bo‘lsa, u shu konlarning bittasi. Imzolangan bitimga asosan, konni o‘zlashtirishga oid barcha xarajatlar davlat kafolati yoki budjet mablag‘lari hisobidan emas, to‘liq investorlar hisobidan amalga oshiryapti. Foydaning 50 foizi investorga, 50 foizi davlatga tegishli bo‘ladi. Qonunchilikda ushbu kelishuv Mahsulotni taqsimlash bitimi deyiladi. Hamkorlar, xorijiy investorlar bilan faqat bitta kon bo‘yicha imzolanadi. Mana, atay shu bitimni oldim. Ko‘rsangiz, har bir varag‘i ishchi guruh, investorlar, xalqaro yuristlar jalb qilingan holda tayyorlangan. Bu qandaydir bir kechada paydo bo‘lgan hujjat emas, tizimli, qonunchilik asosida xalqaro normalar bo‘yicha majburiyatlar belgilangan kelishuv. Bitimda berilgan huquqlar faqatgina kelishuv muddati davomida va aynan shartnomada ko‘rsatilgan hududga amal qilishi yozilgan. Muddat — 35 yil. Nimaga 35 yil degan savol bo‘lishi mumkin. Sababi — “Mustaqillikning 25 yilligi” konida (avvalgi nomi Gadjak) geologiya-qidiruv ishlarining o‘ziga kamida 8 yil ketadi”, — deydi vazir.
Uning ta'kidlashicha, bitimda investorga berilgan huquq belgilangan muddatda shartnomadagi maydonda ishlarni amalga oshirishi belgilangan. Shartnoma hududi — bitta kon va uning atrofidagi hudud. Ya’ni, investorga bitta hududdagi konni o‘z mablag‘lari hisobidan 35 yil davomida o‘zlashtirish huquqi berilgan. Bitimga imzo chekish — O‘zbekiston nomidan bo‘lgani uchun bosh vazir o‘rinbosariga bu vakolat berilgan.
Mavzuga doir:
- O‘zbekistonga Rossiya gazini Qozog‘iston orqali yetkazib berish masalasi muhokama qilindi
- O‘zbekiston va “Gazprom” o‘rtasida hamkorlik bo‘yicha yo‘l xaritasining suverenitetga tahdidi yo‘qligi ma’lum qilindi
- Jamoatchilik “Gazprom” va O‘zbekiston o‘rtasida imzolangan “Yo‘l xaritasi” haqidagi xabar eʼlon qilinishini bir kun kutdi
Izoh (0)