Buxoro viloyatining Kogon tumanida avtobus va yuk mashinasi ishtirokida YTH sodir bo‘lgani, ag‘darilgan avtobus ichida maktab o‘quvchilari bo‘lgani haqida xabar berilgan edi. Bosh prokuratura matbuot xizmati rahbari Hayot Shamsutdinov holat bo‘yicha maʼlumot berdi.
Maʼlum qilinishicha, hodisa yuzasidan Buxoro viloyati ichki ishlar tergov organi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib, darhol tergovga kirishilgan.
Bundan tashqari, Buxoro viloyati prokuraturasi tomonidan o‘tkazilgan tekshirishda ayrim mansabdor shaxslar maktab bolalarini avtobusda tashish va hamrohlik qilish ishlarini tashkil qilishda qo‘pol qonun buzilishi holatlariga yo‘l qo‘yganliklari aniqlangan.
Ushbu holat yuzasidan Jinoyat kodeksining 207-moddasi (mansabga sovuqqonlik bilan qarash) bilan jinoyat ishi qo‘zg‘atilgan.
“Tergov harakatlari har tomonlama, to‘liq va xolisona o‘tkazilishi va natijasi bo‘yicha qonuniy qaror qabul qilinishi taʼminlanadi”, — deyiladi xabarda.
Izoh (0)