Saudiyada Makkaga ziyoratchilarni olib ketayotgan avtobus YTHga uchrab, 20 kishi halok bo‘ldi (video)
Saudiya Arabistonida yengil avtomobil va avtobus ishtirokida sodir bo‘lgan yo‘l-transport hodisasi oqibatida kamida 20 kishi halok bo‘ldi, 29 kishi jarohat oldi, deb xabar bermoqda Al-Ekhbariya.
Telekanal maʼlumotlariga ko‘ra, Makkaga ziyoratchilarni olib ketayotgan avtobusning tormozi ishdan chiqqan. Haydovchi boshqaruvni yo‘qotib, yengil avtomobil bilan to‘qnashgan, shundan so‘ng avtobus ag‘darilib, yonib ketgan. Jabrlanganlarning aksariyati kuyish jarohatlarini olgan.
Hodisa Asir provinsiyasida sodir bo‘ldi, deya aniqlik kiritadi Al-Arabiya. Hudud gubernatori Turki ibn Talal al-Saud politsiya boshlig‘i hamrohligida shifoxonalarda yaradorlarni borib ko‘rdi va sud-tibbiyot ekspertlari bilan uchrashdi — ular aksariyat qismi kuyib ketgan jasadlarni aniqlashda yordam bermoqda, deyiladi xabarda.
