Rossiyaning Samara viloyati Stavropol rayonida 16-yanvar kuni o‘zbekistonliklar bo‘lgan mashina yo‘l-transport hodisasiga uchradi. Bu haqda Samara viloyati prokuraturasi xabar berdi.
Ma’lum qilinishicha, mahalliy vaqt bilan taxminan soat 11:30 da Bolshaya Ryazan qishlog‘i yaqinida M-5 Ural avtomagistralining 745-kilometrida ikkita avtomobil ishtirokida YTH sodir bo‘lgan. Dastlabki ma’lumotlarga ko‘ra, Lada Largus haydovchisi boshqaruvni yo‘qotib, qarama-qarshi yo‘nalishga chiqib ketgan va yuk mashinasi bilan to‘qnashgan.
Hodisa joyida huquq-tartibot idoralari va qutqaruv xizmatlari ishlamoqda. Vaziyatdan xabardor manbaga ko‘ra, Largus’da yetti kishi bo‘lgan. Ularning barchasi O‘zbekiston fuqarolari. Hodisa oqibatida uch nafari halok bo‘lgan, to‘rt nafari shifoxonaga yotqizilgan.
Eslatib o‘tamiz, 11-yanvar kuni Rossiyaning Penza viloyatida yo‘l-transport hodisasi oqibatida sakkiz nafar o‘zbekistonlik halok bo‘lgandi. Penza viloyatida JAC rusumli mikroavtobus qarama-qarshi yo‘lga chiqib ketishi oqibatida Volvo yuk mashinasi bilan to‘qnashgan. Mikroavtobus ichida ketayotgan O‘zbekiston fuqarolarining 8 nafari halok bo‘lgan.
Prezidenti topshirig‘i bilan Mudofaa vazirligining maxsus samolyoti 8 nafar o‘zbekistonlikning jasadini Urganchga olib kelgan.
Izoh (0)