Qamchiq dovonidagi YTH oqibatida ikki nafar haydovchi va uch nafar yo‘lovchi tan jarohati olib, voqea joyida vafot etgan. Bu haqda Yo‘l harakati xavfsizligi xizmati xabar berdi.
Maʼlum qilinishicha, hodisa 11-fevral kuni soat 23:40 larda Namangan viloyati, Pop tumani, Qamchiq dovoni hududidan o‘tgan xalqaro ahamiyatdagi A-373 avtomobil yo‘lining 222-kilometrida sodir bo‘lgan. Haydovchi K.Y. “DAF” rusumli yuk avtomobilini (yengil avtomobillarni tashuvchi) boshqarayotib harakat xavfsizligini taʼminlamasdan, yo‘lning xavfli burilish qismida boshqaruvni yo‘qotgan. Haydovchi qarama-qarshi yo‘nalishni ajratib turuvchi to‘siqqa urilib, qarshisidan kelayotgan haydovchi J.A. boshqaruvida bo‘lgan Isuzu rusumli yuk avtomobili bilan to‘qnashib, YTH sodir etgan.
Natijada ikkala haydovchi hamda uch nafar yo‘lovchi tan jarohati olib, voqea joyida vafot etgan.
Mazkur YTH yuzasidan Namangan viloyati IIB huzuridagi TB tomonidan Jinoyat kodeksining 266-moddasi 3-qismi “a” bandi bilan jinoyat ishi qo‘zg‘atilib, dastlabki tergov harakatlari olib borilmoqda.
Mazkur YTH vaqtida “DAF” rusumli yuk transport vositasiga ortilgan bir qancha yengil avtomobillar pastlikka tushib ketgan.
Izoh (0)