“Hech birimizning YTHga uchramasligimiz va o‘lmasligimiz kafolatlanmagan, bu dahshat!” – ekspert

Oliy Majlis Senati eksperti Nosirjon Zokirov “Daryo” muxbiriga bergan intervyusida ba’zi noprofessional haydovchilarning xatosi bilan begunoh insonlar vafot etayotganini aytib o‘tdi.

“Shu yilning mart oyida Toshkentdagi Mirzo Ulug‘bek ko‘chasida haydovchi xavfsizlikni ta’minlay olmay, o‘rtadagi ajratuvchi yo‘lakdan o‘tib, qarama-qarshi tomondan kelayotgan transport vositasi bilan to‘qnashib ketgan. Natijada qarama-qarshi tomondan kelayotgan avtomobilda bo‘lgan, hech narsani anglab yetishga ulgurmagan ikki kishi hayotdan ko‘z yumdi. Shu vaziyatni bir ko‘rib chiqsak: yomg‘ir yog‘ib turibdi, yo‘l sirpanchiq, tormoz berib bo‘lmaydi. Haydovchi esa shuni tushunmagani yoki bilmagani uchun katta tezlikda kelib, bir soniyada boshqaruvni yo‘qotib, fojiali YTHga sababchi bo‘ldi”, – dedi Nosirjon Zokirov.

Oliy Majlis ekspertining tahlillariga ko‘ra, hozirgi kundan hech kim yo‘l-transport hodisasiga uchramasligi kafolatlanmagan.

“Afsus, bu dahshat! Men “dahshat” degan so‘zni yomon ko‘raman. Hech birimizning YTHga uchramasligimiz va o‘lmasligimiz kafolatlanmagan. Chunki men emas, birov kelib avtomobil bilan ursa yoki ustimizga kelib ag‘anab tushsa, nima qilamiz? Hech narsa qilolmaymiz! Har kun kechga borib uyga qaytganimda shukr, omon-eson keldim, deb aytaman. Ko‘cha-ko‘yda bolalarimiz, nabiralarimiz yuradi. Biz ularning xavfsiz bo‘lishini xohlaymiz”, – dedi u.

Ekspertning alohida ta’kidlashicha, qotillik yoki boshqa jinoyatlar kamaymoqda, lekin YTHda halok bo‘layotganlar soni kamayayotgani yo‘q.

Avvalroq Nosirjon Zokirov avtomaktablarda oddiy testni to‘g‘ri yecholmaydigan o‘qituvchilar borligi haqida aytib o‘tgan edi.