Isroil bosh vaziri Binyamin Netanyaxuning idorasi yahudiy ziyoratchilar va sayyohlar uchun Quddusdagi al-Aqso masjidiga kirishni ramazon oyi oxirigacha taqiqladi. Bu haqda Al Arabia xabar berdi.
O'tgan hafta Isroil politsiyasining al-Aqsoga bostirib kirishi G‘azo, Livan va Suriyadan Isroilga raketa hujumlari uyushtirilishiga sabab bo‘lgan va bu hujumlar Isroilning qarshi hujumlari bilan kutib olingan. Avvalgi yillarda Isroil ramazonning oxirgi 10 kunida yahudiylarga majmuaga kirishni taqiqlagandi.
Al-Aqsodagi to‘qnashuv
5- va 6-aprel kunlari Isroil kuchlari al-Aqso masjididagi falastinliklarga hujum qildi. Politsiya falastinliklarni tarqatishda elektr toki granatalari va rezina o‘qlardan foydalangan. Isroil huquq-tartibot idoralari o‘nlab “voyaga yetmagan jinoyatchilar” politsiyaga tosh otayotgani, xavfsizlik kuchlari esa tartibni tiklash uchun harakat qilishga majbur bo‘layotganini iddao qilgan.
Livanning “Hizbulloh” eronparast qurolli harakati Isroilga qarshi mumkin bo‘lgan “barcha choralarni” qo‘llab-quvvatlashi haqida ogohlantirgan. Mazkur bayonot fonida Livan hududidan Isroilga raketalar uchirilgan, Isroil ham bunga javoban qarshi aviahujumni amalga oshirgan.
AQSH, Isroil, Livan va G‘azodan uchirilgan raketalardan keyin o‘zini himoya qilish huquqiga ega ekanini bildirgan. Eron prezidenti Ibrohim Raisiy falastinliklarga qarshi hujumni qoralab, bunga qarshi chora ko‘rishga chaqirgan.
Shuningdek, Suriyadan Isroilga oltita raketa uchirilgan, Isroil qarshi hujumni amalga oshirgan. Iordaniya ma’muriyati Isroilning provokatsiyalari bosib olingan Sharqiy Quddusdagi al-Aqso masjidi majmuasini “jang maydoni”ga aylantirishi haqida ogohlantirgan.
“Tolibon” va Qozog‘iston ham al-Aqsoda yuz bergan vaziyat bo‘yicha o‘z pozitsiyasini bildirgan. Eron prezidenti musulmon yetakchilarni Isroilga qarshi front tuzishga chaqirgan.
Izoh (0)