Eron prezidenti Ibrohim Raisiy 9-aprel kuni musulmon yetakchilari bilan bir qator muzokaralar o‘tkazdi va “Falastinni ozod qilish uchun Isroilga qarshi front yaratish”ga chaqirdi. Bu haqda Ynet xabar berdi.
Isroildagi keskinliklar va Al-Aqsodagi voqealar fonida Ibrohim Raisiy Suriya, Jazoir va Turkmaniston yetakchilari bilan Isroilga nisbatan musulmonlar birligining ahamiyati haqida gapirdi. Eron rahbari Erdo‘g‘on bilan ham gaplashgani, u ham “Isroilning Falastinliklarga qarshi tajovuzi qarshisida musulmon dunyosining birligi” muhimligini ta’kidlaganini aytdi.
9-aprel kuni Suriya prezidenti Bashar al-Asad va Raisiy o‘rtasida telefon muloqoti bo‘lib o‘tdi. Oxirgi kunlarda Eron muqaddas joydagi voqealar va Falastin maydonidagi keskinlik tufayli Islom hamkorlik tashkilotining favqulodda yig‘ilishini chaqirishga urindi. Asad va Raisiy o‘rtasidagi suhbatda so‘nggi voqealar, shuningdek, ikki davlat munosabatlariga oid boshqa masalalar muhokama qilingan.
Izoh (0)