10-aprel kuni Turkiya o‘z harbiy-dengiz floti tarkibiga jangovar dronlarni tashishga mo‘ljallangan dunyodagi birinchi aviatashuvchi kema — “Anadolu” desant kemasini qabul qildi. U xususan, Bayraktar oilasiga mansub dronlarni olib yuradi.
Kema Istanbulning Sedef kemasozlik korxonasida qurilgan. Loyihada 130 dan ortiq mahalliy subpudratchilar ishtirok etgan, kema komponentlarining qariyb 70 foizi mahalliy ishlab chiqarishga tegishli. Respublika prezidenti Rajab Toyyib Erdo‘g‘on yangi harbiy kemani qabul qilish marosimida ishtirok etdi.
“Bu kema zarurat tug‘ilganda dunyoning istalgan burchagida harbiy va gumanitar amaliyotlar o‘tkazish imkonini beradigan xususiyatlarga ega”, — deya Erdo‘g‘on so‘zlaridan iqtibos keltirdi Turkiya rahbari matbuot xizmati.
Kema 2019-yilda suvga tushirilgan, sinovlar esa 2022-yilning yozida yakunlangan. “Anadolu” 11 ta so‘nggi rusumdagi Bayraktar TB3 turk hujumchi dronlari yoki hozir ishlab chiqilayotgan ilg‘or Kizilelma reaktiv dronlarini qabul qila oladi. Shuningdek, kema palubasiga 10 tagacha jangovar vertolyot, angarga esa 30 tagacha dron bilan birga 19 ta vertolyotni joylashtirish mumkin.
“Anadolu” desant kemasi vazifasini ham bajara oladi. Ishlab chiqaruvchilarning ma’lumotlariga ko‘ra, kema o‘zining logistik ta’minotiga ega hamda Egey, Qora va O‘rta Yer dengizlari havzalaridagi potensial mojaro zonasiga Turkiya qurolli kuchlarining kamida bitta batalon shaxsiy tarkibini olib borishi mumkin. Hammasi bo‘lib, kema bortiga 94 ta zirhli texnika, jumladan 13 tank va 33 zirhli transport vositasi va piyodalar uchun jangovar transport vositalarini joylashtirish mumkin.
Zarur bo‘lganda “Anadolu” tabiiy ofatlar oqibatlarini bartaraf etish va qochqinlarni evakuatsiya qilish uchun ishlatilishi mumkin. Kema bortida to‘liq kasalxona va ikkita operatsiya xonasi joylashgan.
“Anadolu” 38 km/soatgacha tezlikka chiqa oladi. Uning maksimal sig‘imi 27 000 tonnani tashkil qiladi. Taqqoslash uchun: dunyodagi eng yirik Amerika harbiy aviatashuvchi kemasi “Nimits”ning sig‘imi 106 000 tonnadan ortiq, Rossiya dengiz floti aviatashuvchisi “Admiral Kuznetsov”ning sig‘imi esa 61 000 tonna, u 2019-yildan beri ta’mirlanmoqda.
Izoh (0)