AQSH Livan va G‘azoning Isroilga raketa uchirganini qoraladi

AQSH Isroil Livan hududidan uchirilgan raketalardan keyin o‘zini himoya qilish huquqiga ega ekanini bildirdi. Bu haqda Al Arabia xabar berdi.

6-aprel kuni Livan hududidan Isroilga 30 ga yaqin raketa uchirilgani ma’lum qilindi. Bu Isroil hukumati tomonidan e’lon qilingan ma’lumot hisoblanadi. Livandagi “Hizbulloh” guruhi aviahujum sodir bo‘lishidan oldin falastinliklarga hujum qilgan Isroilga qarshi “barcha choralar” bilan javob qaytarishini bildirdi. Livandan otilgan raketalardan so‘ng Isroil ham qarshi aviahujumni boshladi.

“Biz Livan va G‘azodan Isroilga raketa uchirilishini qoralaymiz. Isroil xavfsizligiga bo‘lgan sodiqligimiz qat’iydir va Isroilning har qanday tajovuzdan o‘zini himoya qilish uchun qonuniy huquqini tan olamiz”, — dedi AQSH Davlat departamenti matbuot kotibi Vedant Patel.

O‘z navbatida Eron prezidenti Ibrohim Raisiy Isroilning falastinliklarga nisbatan munosabatini qoralab, “Islom hamkorlik tashkilotining favqulodda yig‘ilishini o‘tkazish va Falastin xalqini himoya qilish uchun qo‘shma rezolyutsiya qabul qilishga” chaqirdi.

5 va 6-aprel kunlari Isroil kuchlari Al-Aqso masjididagi falastinliklarga hujum qildi. Politsiya falastinliklarni tarqatishda elektr toki granatalari va rezina o‘qlardan foydalandi. Isroil huquq-tartibot idoralari o‘nlab “voyaga yetmagan jinoyatchilar” politsiyaga tosh otayotgani, xavfsizlik kuchlari esa tartibni tiklash uchun harakat qilishga majbur bo‘layotganini iddao qilgan.

Falastin Qizil Yarim Oy jamiyatiga ko‘ra, Isroil xavfsizlik kuchlari shifokorlarning voqea joyiga kelishiga va yaradorlarga yordam ko‘rsatishiga ruxsat bermagan. Isroilning xatti-harakatlari, xususan, Iordaniya va Misr tomonidan qoralangan.