Armaniston va Ozarbayjon chegarasida otishma sodir bo‘ldi. Tomonlarning Mudofaa vazirligi halok bo‘lganlar va yaralanganlar haqida xabar bermoqda. Bu haqda “RIA Novosti” xabar berdi.
Ozarbayjon Mudofaa vazirligiga ko‘ra, 11-aprel kuni uning Lochin yo‘nalishidagi pozitsiyalari Armaniston Qurolli kuchlari tomonidan o‘qqa tutilgan. Vazirlik chegaradagi vaziyatni Armaniston tomonining provokatsiyasi deb atamoqda.
“Belgilangan yo‘nalishda joylashgan bo‘linmalarimiz tomonidan ko‘rilgan zarur chora-tadbirlar natijasida qarshi tomon katta miqdorda talafot ko‘rdi. Ozarbayjon askarlari orasida ham halok bo‘lgan va yaralanganlar bor”, — deyiladi bayonotda.
Shuningdek, Ozarbayjon Mudofaa vazirligi Armaniston bilan chegarada yuqori keskinlik saqlanib qolayotgani, dushman katta talafot ko‘rayotgani haqida xabar berdi. Qo‘shimcha ma’lumotlar jamoatchilikka taqdim etiladi.
Armaniston Mudofaa vazirligi, o‘z navbatida, aynan ozarbayjonlik harbiylar Tex hududida muhandislik ishlari olib borayotgan arman askarlariga qarata o‘t ochganini ma’lum qildi. Vazirlik arman kuchlari orasida yo‘qotishlar va yaradorlar borligini qayd etdi, qarshi tomon minomyotlardan foydalangani aytildi.
Arman ommaviy axborot vositalari allaqachon otishma oqibatida Armaniston Qurolli kuchlari maxsus armiyasi korpusi qo‘mondoni Armen Gyozalyan yaralanganini ma’lum qilgan. Ijtimoiy tarmoqlarda otishma joyidan video e’lon qilingan.
Tasdiqlanmagan ma’lumotlarga ko‘ra, Armaniston Lochin yo‘nalishida piyoda askarlar va og‘ir texnikalar to‘plamoqda. Arman harbiylari Ozarbayjon Qurolli kuchlariga qarshi artilleriya va dronlardan foydalanishga urinayotgani aytilgan. Armaniston parlamenti Ozarbayjon bilan chegaradagi vaziyat keskinlashgani tufayli majlisni to‘xtatdi.
Izoh (0)