Исроил бош вазири Биньямин Нетаньяхунинг идораси яҳудий зиёратчилар ва сайёҳлар учун Қуддусдаги ал-Ақсо масжидига киришни рамазон ойи охиригача тақиқлади. Бу ҳақда Аl Arabia хабар берди.
Ўтган ҳафта Исроил полициясининг ал-Ақсога бостириб кириши Ғазо, Ливан ва Суриядан Исроилга ракета ҳужумлари уюштирилишига сабаб бўлган ва бу ҳужумлар Исроилнинг қарши ҳужумлари билан кутиб олинган. Аввалги йилларда Исроил рамазоннинг охирги 10 кунида яҳудийларга мажмуага киришни тақиқлаганди.
Ал-Ақсодаги тўқнашув
5- ва 6 апрель кунлари Исроил кучлари ал-Ақсо масжидидаги фаластинликларга ҳужум қилди. Полиция фаластинликларни тарқатишда электр токи гранаталари ва резина ўқлардан фойдаланган. Исроил ҳуқуқ-тартибот идоралари ўнлаб “вояга етмаган жиноятчилар” полицияга тош отаётгани, хавфсизлик кучлари эса тартибни тиклаш учун ҳаракат қилишга мажбур бўлаётганини иддао қилган.
Ливаннинг “Ҳизбуллоҳ” эронпараст қуролли ҳаракати Исроилга қарши мумкин бўлган “барча чораларни” қўллаб-қувватлаши ҳақида огоҳлантирган. Мазкур баёнот фонида Ливан ҳудудидан Исроилга ракеталар учирилган, Исроил ҳам бунга жавобан қарши авиаҳужумни амалга оширган.
АҚШ, Исроил, Ливан ва Ғазодан учирилган ракеталардан кейин ўзини ҳимоя қилиш ҳуқуқига эга эканини билдирган. Эрон президенти Иброҳим Раисий фаластинликларга қарши ҳужумни қоралаб, бунга қарши чора кўришга чақирган.
Шунингдек, Суриядан Исроилга олтита ракета учирилган, Исроил қарши ҳужумни амалга оширган. Иордания маъмурияти Исроилнинг провокациялари босиб олинган Шарқий Қуддусдаги ал-Ақсо масжиди мажмуасини “жанг майдони”га айлантириши ҳақида огоҳлантирган.
“Толибон” ва Қозоғистон ҳам ал-Ақсода юз берган вазият бўйича ўз позициясини билдирган. Эрон президенти мусулмон етакчиларни Исроилга қарши фронт тузишга чақирган.
Изоҳ (0)