Falastinliklar Quddusdagi Al-Aqso masjidida barrikada o‘rnatdi, Isroil politsiyasi esa ketma-ket ikkinchi kecha binoga bostirib kirishga urindi. Falastin Qizil yarim oy jamiyati ma’lumotlariga ko‘ra, so‘nggi to‘qnashuvlarda olti kishi jarohatlangan, deb xabar bermoqda Associated Press agentligi.
Quddus vaqfi va Al-Aqso masjidi bo‘yicha departamentning xabar berishicha, politsiya falastinliklarni tarqatish uchun yana elektr toki granatalari va rezina o‘qlardan foydalangan. Isroil huquq-tartibot idoralari o‘nlab “voyaga yetmagan jinoyatchilar” politsiyaga tosh otayotgani, xavfsizlik kuchlari esa tartibni tiklash uchun harakat qilishga majbur bo‘layotganini iddao qildi.
5-aprel kuni ham Falastinning WAFA agentligi Isroil politsiyasi Al-Aqso masjidiga bostirib kirgani haqida xabar bergandi. Agentlik maʼlumotlariga ko‘ra, xavfsizlik kuchlari masjiddagi falastinliklarga hujum qilib, shovqin tarqatuvchi granatalar, ko‘zni yoshlatuvchi gaz, rezina o‘q va dubinkalardan foydalangan. Falastin Qizil Yarim Oy jamiyatiga ko‘ra, Isroil xavfsizlik kuchlari shifokorlarning voqea joyiga kelishiga va yaradorlarga yordam ko‘rsatishiga ruxsat bermagan. Isroilning xatti-harakatlari, xususan, Iordaniya va Misr tomonidan qoralandi.
Shuningdek, 5-aprel kuni Isroil armiyasi matbuot kotibi Avixay Edriy G‘azo sektoridan Isroilga 9 ta raketa uchirilganini ma’lum qildi. Uning so‘zlariga ko‘ra, ulardan to‘rttasi havo hujumidan mudofaa tizimlarini urib tushirgan, qolgan to‘rttasi esa G‘azoga tutash ochiq hududlarga qulagan. Shundan so‘ng Isroil harbiy-havo kuchlari ham G‘azo sektoridagi nishonlarga aviazarba bergani xabar qilindi.
Izoh (0)