Livan va Isroil bir-birining hududiga raketalar uchirmoqda. Bu haqda Al Arabia xabar berdi.
Ma’lum qilinishicha, o‘nlab raketalar Isroil shimoliga uchgan. Bunga javoban Isroil Livan janubidagi shahar chetiga zarba bergan. Ijtimoiy tarmoqlarda hujum aks etgan kadrlar tarqalmoqda. Isroil aviahujum oqibatida uch kishi jarohatlanganini xabar qildi.
Tasdiqlanmagan ma’lumotlarda Isroil tomon uchirilgan raketalar katta ehtimol bilan Falastin lagerlaridan amalga oshirilgani prognoz qilingan. Isroil bosh vaziri Binyamin Netanyaxu xavfsizlik bo‘yicha tezkor yig‘ilish o‘tkazmoqda.
Guvohlar Isroil qiruvchi samolyotlari Livan janubi osmonida qayd etilganini aytmoqda. Livanning eronparast qurolli harakati “Hizbulloh” Isroil kuchlari tomonidan Al-Aqso masjidida falastinliklarga qilingan hujum sababli Isroilga qarshi mumkin bo‘lgan “barcha choralarni” qo‘llab-quvvatlashi haqida ogohlantirgandi.
“Hizbulloh Isroil bosqinchi kuchlarining Al-Aqso masjidiga uyushtirgan hujumini va uning dindorlarga qilgan hujumlarini keskin qoralaydi”, — deyilgan “Hizbulloh” bayonotida.
Isroilning ashaddiy dushmani “Hizbulloh” G‘azoda hukmronlik qilayotgan HAMAS guruhi bilan yaqin aloqada.
Livandan Isroilga oxirgi raketa 2022-yil aprelida uchirilgan. Birlashgan Millatlar Tashkilotining Livandagi Muvaqqat kuchlari tomonidan qo‘riqlanadigan Livan va Isroil o‘rtasidagi chegara hududida vaqti-vaqti bilan xavfsizlik hodisalari sodir bo‘ladi.
Ko‘pgina G‘arb hukumatlari tomonidan “terrorchi” tashkilot deb hisoblangan “Hizbulloh” shia jangari guruhi 1975-1990-yillardagi fuqarolar urushi tugaganidan keyin o‘z qurollarini saqlab qolgan Livandagi yagona fraksiyadir.
Eslatib o‘tamiz, 5 va 6-aprel kunlari Isroil kuchlari Al-Aqsa masjididagi falastinliklarga hujum qildi. Politsiya falastinliklarni tarqatish elektr toki granatalari va rezina o‘qlardan foydalangan.
Isroil huquq-tartibot idoralari o‘nlab “voyaga yetmagan jinoyatchilar” politsiyaga tosh otayotgani, xavfsizlik kuchlari esa tartibni tiklash uchun harakat qilishga majbur bo‘layotganini iddao qilgan. Falastin Qizil Yarim Oy jamiyatiga ko‘ra, Isroil xavfsizlik kuchlari shifokorlarning voqea joyiga kelishiga va yaradorlarga yordam ko‘rsatishiga ruxsat bermagan. Isroilning xatti-harakatlari, xususan, Iordaniya va Misr tomonidan qoralangan.
Izoh (0)