“Tolibon” harakati Isroil kuchlarining Al-Aqso masjidida falastinliklarga qilgan hujumini keskin qoraladi. Bu haqda Sputnik Afg‘oniston xabar berdi.
“Tolibon” matbuot kotibi Zabihulloh Mujohid masjiddagi hujumda Isroil xavfsizlik kuchlarini aybladi. Afg‘oniston muvaqqat hukumati rasmiysi muqaddas joylarga hujumlarni xalqaro qonunlarga zid deb baholadi. U bu Isroil tomonidan musulmonlar qanday zulmga duchor bo‘layotganini ko‘rsatishini qayd etdi.
Shuningdek, “Tolibon” islom dunyosi davlatlarini falastinliklarni himoya qilishda birgalikda harakat qilishga chaqirdi.
5- va 6-aprel kunlari Isroil kuchlari Al-Aqso masjididagi falastinliklarga hujum qildi. Politsiya falastinliklarni tarqatishda elektr toki granatalari va rezina o‘qlardan foydalangan. Isroil huquq-tartibot idoralari o‘nlab “voyaga yetmagan jinoyatchilar” politsiyaga tosh otayotgani, xavfsizlik kuchlari esa tartibni tiklash uchun harakat qilishga majbur bo‘layotganini iddao qilgan.
Livanning “Hizbulloh” eronparast qurolli harakati Isroilga qarshi mumkin bo‘lgan “barcha choralarni” qo‘llab-quvvatlashi haqida ogohlantirgan. Mazkur bayonot fonida Livan hududidan Isroilga raketalar uchirilgan, Isroil ham bunga javoban qarshi aviahujumni amalga oshirgan.
AQSH, Isroil, Livan va G‘azodan uchirilgan raketalardan keyin o‘zini himoya qilish huquqiga ega ekanini bildirgan. Eron prezidenti Ibrohim Raisiy falastinliklarga qarshi hujumni qoralab, bunga qarshi chora ko‘rishga chaqirgan.
Iordaniya ma’muriyati Isroilning provokatsiyalari bosib olingan Sharqiy Quddusdagi Al-Aqso masjidi majmuasini “jang maydoni”ga aylantirishi haqida ogohlantirgan.
Iordaniya Tashqi ishlar vazirligi agar Isroil politsiyasi “namozxonlarni masjiddan chiqarish uchun bostirib kirishga tayyorgarlik ko‘rish maqsadida yana hujum qilsa, bu vaziyatni yanada keskinlashtirib, zo‘ravonlikka olib kelishini” bildirdi. Vazirlik buning uchun hamma tovon to‘lashini qayd etdi.
Izoh (0)