AQSHning Nyu-Jersi shtatidagi masjidda turkiyalik erkak imomni pichoqladi. Bu haqda Al Arabia xabar berdi.
Ma’lum qilinishicha, pichoqlaganlikda ayblanayotgan erkak qotillikka urinish aybini tan olmagan. Sharif Zorba ismli gumonlanuvchi Paterson shahridagi Umar masjidida bomdod namozi paytida imom Sayid Elnaqibni pichoqlagani uchun qo‘lga olingan. Imomga hujum 9-aprel, shanba kuni sodir etilgan.
Kuzatuv kamerasiga muhrlangan tasvirga ko‘ra, namoz o‘qilayotgan paytda 32 yoshli erkak uchinchi qatorning o‘rtasidan chiqib, imomga orqadan yaqinlashib, uni pichoqlagan.
Imomning sog‘lig‘i hozirda barqaror. Ayblanuvchi qochayotgan payti namozxonlar tomonidan qo‘lga olingan. Zorba qotillikka urinishda va noqonuniy qurol saqlashda aybdor emasligini aytmoqda. U hozirda tergov hibsxonasida saqlanmoqda. Uning navbatdagi sud majlisi 14-aprel kuni bo‘lib o‘tishi rejalashtirilgan.
“Hujum ortidagi sabab noma’lumligicha qolmoqda va tergov davom etmoqda”, — deyiladi xabarda.
Prokuratura davom etayotgan tergovga tayanib, Zorbaning hujumi sabablari haqida qo‘shimcha ma’lumot bera olmasligini bildirdi. Agar Zorba aybdor deb topilsa, u 26 yillik qamoq jazosiga hukm qilinishi mumkin.
Izoh (0)