Rossiya prezidenti Vladimir Putin va Ozarbayjon prezidenti Ilhom Aliyev telefon orqali gaplashib, Tog‘li Qorabog‘ atrofidagi vaziyatni muhokama qildi. Bu haqda Kreml matbuot xizmati xabar berdi.
“Rossiya, Ozarbayjon va Armaniston rahbarlarining 2020-yil 9-noyabr va 2021-yil 11-yanvardagi bayonotlariga muvofiq, Tog‘li Qorabog‘ atrofidagi vaziyatni yanada barqarorlashtirish muhokamasi davom etdi”, — deyiladi xabarda.
Davlat rahbarlari mintaqada tinchlik, xavfsizlik va ijtimoiy-iqtisodiy rivojlanishni ta’minlash masalalarini ko‘rib chiqdi, shuningdek, transport kommunikatsiyasini qayta tiklashni muhokama qildi.
2020-yilning sentabr oyi oxirida Tog‘li Qorabog‘da Ozarbayjon va Armaniston davlatlari o‘rtasida qurolli nizo kelib chiqqan edi. 2020-yilning 10-noyabrida o‘t ochishni to‘xtatish to‘g‘risidagi uch tomonlama kelishuv imzolanishi bilan nizolar yakuniga yetdi. Unga ko‘ra, Boku Tog‘li Qorabog‘ bilan qo‘shni yetti viloyat, shuningdek, Shusha va Gadrut shaharlari ustidan nazoratni qayta tikladi. Hududning qolgan qismiga Rossiya tinchlikparvarlari joylashtirildi. Bundan tashqari, kelishuv Ozarbayjon va Armaniston o‘rtasidagi aloqalar va savdo-iqtisodiy munosabatlarning boshlanishini nazarda tutadi.
Yanvar oyida Rossiya, Armaniston va Ozarbayjon yetakchilari Tog‘li Qorabog‘ni rivojlantirish bo‘yicha qo‘shma bayonotni imzoladi. Bayonnoma mintaqadagi iqtisodiyot va transport infratuzilmasi muammolarini, jumladan, Armaniston va Rossiya o‘rtasidagi temir yo‘l aloqasini tashkil etish masalalarini hal qilishga qaratilgan.
Izoh (0)