Turkiyada pandemiya boshidan buyon koronavirusga chalinish bo‘yicha sutkalik antirekord qayd etildi

Turkiyada pandemiya boshidan buyon bir kecha-kunduzda COVID-19’ga chalinganlar soni rekord darajaga yetdi, deb yozadi “Interfaks” mamlakat Sog‘liqni saqlash vazirligiga tayanib.

O‘tgan bir kecha-kunduzda 55,9 ming kishida koronavirus aniqlangan, shularning 2,3 mingini simptomli bemorlar tashkil qildi. Shuningdek, o‘tgan bir kunda 37,9 mingdan ortiq odam sog‘aydi, 258 nafari esa vafot etdi.

Bundan tashqari, o‘tgan bir sutkada koronavirusga 302 108 ta test topshirilgan, jami topshirilgan testlar soni esa 40 385 250 taga yetgan.

COVID bemorlarda pnevmoniya darajasi 3,1 foizni tashkil qiladi, og‘ir kasallar soni esa 2604 kishiga yetadi.

Turkiyada pandemiya boshidan buyon jami 3,6 million kishi koronavirus bilan kasallangan, shularning 33,2 ming nafari vafot etgan.

Turkiyada 3-aprel kuni koronavirusga chalinish bilan bog‘liq 44 756 ta yangi holat qayd etilgan va bu rekord daraja deb atalgan edi.

Turkiya hukumati koronavirus xavfi tufayli 12-apreldan 12-maygacha dam olish kunlari amal qiluvchi komendantlik soatini joriy qildi. Bu davrda kafe va restoranlar taomlarni xo‘randalar faqat uyga olib ketishi sharti bilan ishlaydi. Prezident Rajab Toyyib Erdo‘g‘on 29-mart kuni ma’lum qilishicha, koronavirus bilan kasallanish bo‘yicha eng yuqori xavfni bildiruvchi qizil toifaga allaqachon 58 ta shahar kirgan, u yerlarda Turkiya aholisining 80 foizi istiqomat qiladi.

“Agar bemorlar va o‘limlar sonini biz gumanitar va tijoriy aloqalar olib boruvchi mamlakatlardan ko‘ra tezroq qisqartira olmasak, global normallashuv jarayonida ortda qolib ketamiz”, — dedi Erdo‘g‘on.

Turkiyada ba’zi yirik shaharlarda, shu jumladan, Istanbul va Izmirda koronavirus pandemiyasining uchinchi to‘lqini boshlangani haqida noyabr oxirida ma’lum qilingan edi. O‘sha paytlarda mamlakatda dam olish kunlari amal qiluvchi komendantlik soati kiritilgan edi. Shuningdek, Yangi yil bayramlari davrida ham komendantlik soati e’lon qilingan. Mart boshida esa Turkiyada ba’zi cheklovlar bekor qilingandi. Sayyohlik mavsumi Turkiyada aprel oyida ochilishi rejalashtirilmoqda.