Ukraina prezidenti Donbassga bordi, kaska va zirhli nimcha kiyib okoplarga tushdi va vaziyat keskinlashganini ma’lum qildi (foto)

Ukraina prezidenti Vladimir Zelenskiy Donbassga ishchi tashrifi doirasida o‘t ochishni to‘xtatish rejimining buzilishi eng ko‘p qayd etilgan harbiylarning old pozitsiyalariga tashrif buyurdi, deb yozadi “RBK”.

Prezident matbuot xizmati tomonidan e’lon qilingan fotosuratlarda Zelenskiy kaska va zirhli nimcha kiygan holda okoplarga tushib, harbiylar bilan muloqot qilayotganini ko‘rish mumkin.

“Odamlarning xotirjamligini saqlab, o‘lkamizni himoya qilayotganingiz uchun rahmat. Sizlar qahramonlik va fidokorlikning haqiqiy namunasisiz”, — dedi prezident.

Uchrashuv ishtirokchilari halok bo‘lganlar xotirasida bir daqiqalik sukut saqladi, shundan keyin prezident harbiylarga mukofotlar va sovg‘alar topshirdi.

Shuningdek, Ukraina prezidenti o‘z tashrifi chog‘ida Donbassdagi vaziyat keskinlashganini tan oldi. Uning ta’kidlashicha, Ukraina Qurolli kuchlari pozitsiyalari tan olinmagan Lugansk va Donetsk xalq respublikalari tomonidan o‘qqa tutilmoqda.

“Biz so‘nggi davr ichida, 1-yanvardan buyon eng yirik eskalatsiya, o‘t ochishni to‘xtatish rejimining buzilishi, qurbonlar va yaralanganlar sonining oshishi kuzatilayotgan barcha nuqtalarni borib ko‘ryapmiz”, — dedi Zelenskiy.

Eslatib o‘tamiz, Ukraina prezidenti Vladimir Zelenskiy frontoldi harbiylari bilan uchrashish va “himoyachilarning ruhini ko‘tarish” uchun mamlakat oliy bosh qo‘mondoni sifatida xizmat safari bilan Donbassga jo‘nab ketgan edi.

Mart oyi oxirida The New York Times gazetasi 4 ming rus qo‘shini Ukraina chegaralariga, xususan, Rostov, Bryansk, Voronej viloyatlari va Qrimga yuborilgani haqida xabar berdi. Hammasi bo‘lib, Rossiya Qurolli Kuchlarining 28 ta taktik batalyon guruhi chegaralar bo‘ylab joylashtirilgan. Conflict Intelligence Team surishtiruv guruhi Rossiya qo‘shinlarining Rossiya—Ukraina chegarasi hududida to‘planishini 2014—2015-yillardan beri eng keskin ko‘rsatkich deb atadi.  Kiyev o‘z chegaralari yaqinida rus qo‘shinlari to‘planganini tasdiqladi va uni “o‘z kuchini ko‘z-ko‘z qilish” deb atadi. AQSh Rossiyadan mazkur “provokatsiyalar”ga izoh berishni talab qildi, shuningdek, AQSh prezidenti Jo Bayden lavozimiga kelganidan beri birinchi marta Ukraina rahbari Vladimir Zelenskiyga qo‘ng‘iroq qildi. Kremlning ta’kidlashicha, Rossiya o‘z hududida o‘z qo‘shinlarini harakatga keltirmoqda va “bu hech kimni bezovta qilmasligi kerak, qo‘shin hech kimga tahdid solmaydi”.

Rossiya qo‘shinlarining Donbassga tortilishi fonida Ukraina NATOga qo‘shilish masalasini qayta ko‘tardi. NATO bosh kotibi Yens Stoltenberg bilan suhbatda Zelenskiy NATO Donbassdagi urushni to‘xtatishning yagona yo‘li ekanini aytdi. AQSh bu g‘oyani hozircha nazariy jihatdan qo‘llab-quvvatlamoqda, Kremlning fikricha, Ukrainaning NATOga a’zo bo‘lishi Donbassdagi inqirozni yanada kuchaytiradi.