Putin va Merkel Donbass va Navalniyni muhokama qildi. Germaniya kansleri Rossiya qo‘shinlarining bir qismini Ukraina chegarasidan olib ketishga chaqirdi

Rossiya prezidenti Vladimir Putin Germaniya kansleri Angela Merkel bilan telefon orqali suhbatlashdi, deb yozadi Meduza.

Muloqot chog‘ida tomonlar boshqa masalalar bilan bir qatorda, Ukraina janubi-sharqida keskinlikning kuchayishi yuzasidan xavotir bildirdi.

“Vladimir Putin so‘nggi vaqtlarda chegara chizig‘ida vaziyatni ataylabdan keskinlashtirayotgan Kiyevning provokatsion xatti-harakatlariga e’tibor qaratdi. Kiyev hukumati avvalo Donetsk va Lugansk bilan to‘g‘ridan to‘g‘ri muzokaralarni yo‘lga qo‘yish bo‘yicha hamda Donbassning alohida maqomini qonuniy rasmiylashtirish bo‘yicha avvalroq erishilgan kelishuvlarga og‘ishmay amal qilishi zarurligi ta’kidlandi”, — deyiladi Rossiya prezidenti matbuot xizmati xabarida.

Keyinroq Germaniya hukumati Putin va Merkel Rossiyaning Ukraina chegaralari yaqinida “kuchaygan harbiy ishtiroki”ni muhokama qilgani haqida xabar berdi. Germaniya kansleri bu qo‘shimcha kuchlarni chegaradan olib ketishga chaqirdi.

Shuningdek, “kansler tomonidan bildirilgan qiziqish tufayli”, suhbat chog‘ida “Navalniy bilan bog‘liq vaziyat” ham tilga olindi, deyiladi Kreml xabarida. Avvalroq prezident matbuot kotibi Dmitriy Peskov Putin “bir necha hafta oldin” Navalniy masalasini xalqaro telefon suhbatlari chog‘ida muhokama qilgan bo‘lsa-da, Kreml u bilan bog‘liq vaziyatni kuzatmayotganini aytgan edi.

Eslatib o‘tamiz, Rossiya qo‘shinlarining Donbassga tortilishi fonida Ukraina NATOga qo‘shilish masalasini qayta ko‘tardi. NATO bosh kotibi Yens Stoltenberg bilan suhbatda Zelenskiy NATO Donbassdagi urushni to‘xtatishning yagona yo‘li ekanini aytdi. AQSh bu g‘oyani hozircha nazariy jihatdan qo‘llab-quvvatlamoqda, Kremlning fikricha, Ukrainaning NATOga a’zo bo‘lishi Donbassdagi inqirozni yanada kuchaytiradi.

Mart oyi oxirida The New York Times gazetasi 4 ming rus qo‘shini Ukraina chegaralariga, xususan, Rostov, Bryansk, Voronej viloyatlari va Qrimga yuborilgani haqida xabar berdi. Hammasi bo‘lib, Rossiya Qurolli Kuchlarining 28 ta taktik batalyon guruhi chegaralar bo‘ylab joylashtirilgan. AQSh rasmiylari Rossiyadan nima sababdan o‘zining janubi-g‘arbiy chegaralariga qo‘shin joylashtirgani haqida izoh talab qildi. Qo‘shma Shtatlar buni Ukrainaga qarshi provokatsiya deb hisoblamoqda.