CNN: AQSh Rossiya qo‘shinlarining kuchaytirilishi fonida Ukrainani qo‘llab-quvvatlash belgisi sifatida Qora dengizga harbiy kemalarini yubormoqchi

AQSh Ukraina chegarasi yaqinida Rossiya qo‘shinlari to‘plangan bir paytda yaqin haftalar ichida Ukrainani qo‘llab-quvvatlash belgisi sifatida Qora dengizga o‘z harbiy kemalarini yuborish imkoniyatini ko‘rib chiqmoqda. Bu haqda CNN AQSh Mudofaa vazirligining ismini oshkor etishni istamagan vakiliga tayanib xabar berdi, deb yozadi Meduza.

Uning so‘zlariga ko‘ra, Amerika floti Qora dengizga muntazam ravishda kirib turadi, ammo kemalarning u yerga hozir yuborilishi Rossiyaga AQSh vaziyatni diqqat bilan kuzatayotgani haqida signal beradi.

AQSh Rossiya-Ukraina chegarasi yaqinida Rossiya qo‘shinlarining kuchaytirilishini hujumga urinish deb baholamaydi, dedi CNN suhbatdoshi. Ammo, deya davom etdi u, “agar nimadir o‘zgarsa, biz javob ko‘rsatishga tayyor bo‘lamiz”.

1936-yilda qabul qilingan ko‘rfazlar maqomi to‘g‘risidagi Montryo konvensiyasiga muvofiq, AQSh Turkiyani o‘z kemalarini Dardanell va Bosfor bo‘g‘ozlari orqali Qora dengizga olib o‘tish niyati haqida 14 kun avval xabardor qilishi kerak. Bunday bildirishnoma yuborilgan-yuborilmagani noma’lum, deya qayd etdi CNN.

Keyinroq AQSh Qurolli kuchlari Yevropa qo‘mondonligi matbuot xizmati Qora dengizga kemalar yuborilishini tasdiqlamadi. “Ayni paytda bu masala bo‘yicha siz bilan o‘rtoqlashadigan hech qanday ma’lumot yo‘q”, — deya javob qildi matbuot xizmati “TASS”ga.

Eslatib o‘tamiz, Rossiya qo‘shinlarining Donbassga tortilishi fonida Ukraina NATOga qo‘shilish masalasini qayta ko‘tardi. NATO bosh kotibi Yens Stoltenberg bilan suhbatda Zelenskiy NATO Donbassdagi urushni to‘xtatishning yagona yo‘li ekanini aytdi. AQSh bu g‘oyani hozircha nazariy jihatdan qo‘llab-quvvatlamoqda, Kremlning fikricha, Ukrainaning NATOga a’zo bo‘lishi Donbassdagi inqirozni yanada kuchaytiradi.

Mart oyi oxirida The New York Times gazetasi 4 ming rus qo‘shini Ukraina chegaralariga, xususan, Rostov, Bryansk, Voronej viloyatlari va Qrimga yuborilgani haqida xabar berdi. Hammasi bo‘lib, Rossiya Qurolli Kuchlarining 28 ta taktik batalyon guruhi chegaralar bo‘ylab joylashtirilgan. Conflict Intelligence Team surishtiruv guruhi Rossiya qo‘shinlarining Rossiya—Ukraina chegarasi hududida to‘planishini 2014—2015-yillardan beri eng keskin ko‘rsatkich deb atadi.  Kiyev o‘z chegaralari yaqinida rus qo‘shinlari to‘planganini tasdiqladi va uni “o‘z kuchini ko‘z-ko‘z qilish” deb atadi. AQSh Rossiyadan mazkur “provokatsiyalar”ga izoh berishni talab qildi, shuningdek, AQSh prezidenti Jo Bayden lavozimiga kelganidan beri birinchi marta Ukraina rahbari Vladimir Zelenskiyga qo‘ng‘iroq qildi. Kremlning ta’kidlashicha, Rossiya o‘z hududida o‘z qo‘shinlarini harakatga keltirmoqda va “bu hech kimni bezovta qilmasligi kerak, qo‘shin hech kimga tahdid solmaydi”.